لاہور (پاک ترک نیوز )صدر مملکت آصف علی زرداری لاہور سے جرمنی کے سرکاری دورے پر روانہ ہو گئے۔ گورنر پنجاب سردار سلیم حیدر خان نے ایئرپورٹ پر صدر مملکت کو الوداع کہا۔
ترجمان دفتر خارجہ کے مطابق صدر آصف علی زرداری 24 اکتوبر تک جرمنی کا سرکاری دورہ کریں گے۔ اس دوران وہ اپنے جرمن ہم منصب اور اعلیٰ جرمن قیادت سے ملاقاتیں کریں گے۔
ملاقاتوں میں پاکستان اور جرمنی کے دوطرفہ تعلقات، اقتصادی تعاون اور تجارتی روابط کے فروغ پر خصوصی توجہ دی جائے گی۔ صدر مملکت جرمنی کے کاروباری رہنماؤں سے بھی ملاقاتیں کریں گے۔
ترجمان دفتر خارجہ کا کہنا ہے کہ یہ دورہ دونوں ممالک کے درمیان اعلیٰ سطح کے تبادلوں کا حصہ ہے۔ پاکستان اور جرمنی کے سفارتی تعلقات کی 75ویں سالگرہ کے موقع پر اس دورے کو خصوصی اہمیت حاصل ہے۔
دورے کا مقصد دونوں ممالک کے درمیان شراکت داری کو مزید مضبوط بنانے کے مشترکہ عزم کا اظہار ہے۔
