راولپنڈی ( پاک ترک نیوز) خیبرپختونخوا میں سکیورٹی فورسز کے انٹیلی جنس بیسڈ آپریشن میں پانچ خوارج دہشت گرد مارے گئے،، ٹانک میں چار خوارج اپنے انجام کو پہنچے،، ڈیرہ اسماعیل خان میں ایک خارجی ہلاک ہوگیا،، دہشت گردوں سے بڑی تعداد میں اسلحہ اور گولہ بارود برآمد کر لیا گیا ۔
خیبرپختونخوا کے شہر ہنگو میں فتنہ الخوارج کے 100 سےزائد دہشت گردوں کی دراندازی کی کوشش ناکام بنادی گئی۔پولیس حکام کے مطابق پولیس، سی ٹی ڈی اور دیگر اداروں نے فتنہ الخوارج کی دراندازی ناکام بنائی، کامیاب آپریشن کے بعد اسکول، دیگر املاک اور پہاڑی علاقوں کو کلیئر کردیا گیا ۔
پولیس نے بتایا کہ دہشت گردوں کے مارٹر گولے آبادی پر گرنے سے 6 شہری شہید جبکہ 13 زخمی ہوئے ، دہشت گرد اپنے ہلاک ساتھیوں کی لاشیں اور زخمیوں کو اٹھا کر فرار ہوئے۔
آئی جی خیبر پختونخوا ذوالفقارحمید نے آپریشن میں حصہ لینے والے اہل کاروں کے لیے خراجِ تحسین پیش کرتے ہوئے انعامات اور تعریفی اسناد دینے کا اعلان کیا۔
آئی جی ذوالفقارحمید نے کہا کہ خیبر پختو نخوا پولیس فتنہ الخوارج کا مکمل صفایا کرنے کی صلاحیت رکھتی ہے، عوام کے تحفظ کیلئے کسی قربانی سے دریغ نہیں کیا جائے گا۔
خیبر پختونخوا میں انٹیلی جنس بیسڈ آپریشن ،5خوارج ہلاک
