نئی دہلی (پاک ترک نیوز )بھارتی فضائیہ نے 21 ستمبر سے 7 اکتوبر 2026 تک 17 روز کے لیے فضائی حدود مخصوص کرنے کا نوٹم جاری کردیا، جس کے بعد پاکستان کے دفاعی اور سیکیورٹی اداروں نے صورتحال پر کڑی نظر رکھنا شروع کردی۔
رپورٹ کے مطابق بھارتی فضائیہ کی جانب سے جاری کیے گئے نوٹس ٹو ایئر مشنز، یعنی نوٹم میں مذکورہ مدت کے دوران فوجی سرگرمیوں کے لیے فضائی حدود مختص کیے جانے کی اطلاع دی گئی ہے۔
ذرائع کے مطابق بھارتی نوٹم کے معاملے پر پاکستان کی وزارتِ دفاع میں ایک اہم اجلاس بھی ہوا، جس میں بھارتی فضائی سرگرمیوں اور ان کے ممکنہ اثرات کا تفصیلی جائزہ لیا گیا۔دوسری جانب پاک فوج اور سیکیورٹی اداروں نے پاک بھارت سرحد کے ساتھ نگرانی مزید بڑھا دی ہے۔
رپورٹ کے مطابق پاکستانی فورسز بھارتی فضائیہ کی نقل و حرکت پر نظر رکھے ہوئے ہیں اور کسی بھی ممکنہ صورتحال سے نمٹنے کے لیے تیار ہیں۔
پاکستانی سیکیورٹی ذرائع نے ملک کے دفاعی مؤقف کو دفاعی نوعیت کا قرار دیتے ہوئے کہا ہے کہ افواج ہر قسم کی ہنگامی صورتحال کا مقابلہ کرنے کے لیے تیار ہیں۔تاہم ماہرین کے مطابق صرف نوٹم کا اجرا کسی جارحانہ فوجی کارروائی کی علامت نہیں ہوتا۔
نوٹم بنیادی طور پر ہوا بازی سے متعلق ایک سرکاری اطلاع ہوتی ہے، جس کے ذریعے پائلٹس، ایئرلائنز اور دیگر متعلقہ اداروں کو کسی مخصوص فضائی حدود میں عارضی پابندی، خطرے یا فوجی سرگرمی سے آگاہ کیا جاتا ہے۔
بھارتی فضائیہ کی بڑی فوجی مشقوں کے دوران جنگی طیاروں، اہلکاروں اور آپریشنل طریقہ کار کی تیاری کا جائزہ لیا جاتا ہے، جبکہ مختلف حالات میں فضائی آپریشنز اور رابطہ کاری کی صلاحیت کو بھی آزمایا جاتا ہے۔
