تہران ( پاک ترک نیوز) ایرانی صدر مسعود پزشکیان نے کہا ہے کہ ایران جنگ جاری رکھنا نہیں چاہتا بلکہ اب بھی امن کو ترجیح دیتا ہے، تاہم امریکا اگر ناکہ بندی اور جارحیت ختم کردے تو ایران آبنائے ہرمز کھولنے کے لیے تیار ہے۔بھارتی ٹی وی کو انٹرویو میں مسعود پزشکیان نے کہا کہ امریکا جنگ کے ذریعے اپنے اہداف حاصل کرنے میں ناکام رہا تو اس نے ناکہ بندی کا راستہ اختیار کیا، تاہم امریکا اس طریقے سے بھی کامیاب نہیں ہوگا۔ایرانی صدر کا کہنا تھا کہ سمندری راستہ ایسا راستہ نہیں جس پر ایران کی زندگی کا مکمل انحصار ہو، اس لیے آبنائے ہرمز کی بندش کے ذریعے ایران پر دباؤ ڈالنے کی کوشش کامیاب نہیں ہوگی۔
یہ بھی پڑھیں: ایران کے ہاتھ امریکی زیرِ آب ڈرون لگ گیا، ٹیکنالوجی کی نقل کا خدشہ
مسعود پزشکیان نے کہا کہ ایران اپنے پڑوسی اور مسلم ممالک کے ساتھ کوئی اختلاف نہیں رکھتا، ایران چاہتا ہے کہ اس کے حقوق کا احترام کیا جائے، ظالمانہ پابندیاں ختم کی جائیں اور اسے اس کے بین الاقوامی حقوق دیے جائیں۔ایرانی صدر نے الزام عائد کیا کہ امریکا ایران کو دشمن بنانا چاہتا ہے، جبکہ امریکا، اسرائیل اور یورپی ممالک چاہتے ہیں کہ خطے میں کوئی ملک آزاد نہ رہے۔مسعود پزشکیان نے بتایا کہ پیر کو مسقط میں ایران اور عرب ممالک کے وزرائے خارجہ کا اجلاس بھی ہوگا، جس میں خطے کی موجودہ صورتحال پر بات چیت کی جائے گی۔نئی دہلی میں ایرانی صدر کی ملائیشیا کے صدر سے بھی ملاقات ہوئی، جس میں دوطرفہ تعلقات سمیت خطے کی صورتحال پر تبادلہ خیال کیا گیا۔
