اسلام آباد ( پاک ترک نیوز) گڈز ٹرانسپورٹرز کی ملک گیر ہڑتال آج چوتھے روز میں داخل ہوگئی، جبکہ ٹرانسپورٹرز اور وفاقی حکومت کے درمیان مذاکرات آج دوبارہ ہوں گے۔
مذاکرات میں وفاقی وزیر مواصلات عبدالعلیم خان اور وفاقی وزیر پٹرولیم علی پرویز ملک حکومتی وفد کی نمائندگی کریں گے۔
حکومت اور گڈز ٹرانسپورٹرز کے درمیان مذاکرات میں ہڑتال ختم کرنے اور ٹرانسپورٹرز کے مطالبات پر پیش رفت کے حوالے سے بات چیت ہوگی۔ مذاکرات کامیاب ہونے کی صورت میں وفاقی وزرا اور گڈز ٹرانسپورٹرز کے نمائندے مشترکہ پریس کانفرنس بھی کریں گے۔
اس سے قبل گڈز ٹرانسپورٹرز کے وفاقی اور صوبائی حکومتوں کے ساتھ مذاکرات کامیاب نہیں ہوسکے تھے۔ ٹرانسپورٹرز کا مؤقف ہے کہ مذاکرات کے دوران ان کے مطالبات پر کوئی عملی پیش رفت نہیں ہوئی، جس کے باعث ہڑتال جاری رکھنے کا فیصلہ کیا گیا۔
ملک گیر ہڑتال کے باعث مال بردار گاڑیوں کی آمدورفت متاثر ہے، جس سے مختلف شہروں کے درمیان سامان کی ترسیل اور کاروباری سرگرمیوں پر بھی اثر پڑ رہا ہے۔
یہ بھی پڑھیں: ایران میں بڑے پیمانے پر عسکری تبدیلیاں
ٹرانسپورٹرز کا کہنا ہے کہ مطالبات پر ٹھوس اور عملی اقدامات کیے جانے تک ہڑتال ختم نہیں کی جائے گی، تاہم آج ہونے والے مذاکرات سے معاملہ حل ہونے کی امید پیدا ہوئی ہے۔
