لاہور(پاک ترک نیوز )امیر جماعت اسلامی پاکستان حافظ نعیم الرحمان نے کہا ہے کہ جماعت اسلامی کی تحریک ملک بھر میں جاری ہے اور اب یہ گلی محلوں کی سطح تک پہنچ چکی ہے۔
پریس کانفرنس میں حافظ نعیم الرحمان نے اعلان کیا کہ کل 3 ستمبر کو پورے ملک میں ہڑتال ہوگی، کارکنان مارکیٹوں میں تاجروں سے رابطے کر رہے ہیں اور مارکیٹوں کے صدور نے بھی ہڑتال کی حمایت کردی ہے۔
ان کا کہنا تھا کہ حکومت نے عوام پر پٹرول اور دیگر اشیاء پر بھاری لیوی عائد کر رکھی ہے، جبکہ بجلی کے شعبے میں بھی کیپسٹی پیمنٹس اور فکسڈ چارجز کے نام پر عوام سے اربوں روپے وصول کیے جا رہے ہیں۔
حافظ نعیم الرحمان نے دعویٰ کیا کہ جماعت اسلامی کے دھرنے کے نتیجے میں ڈیزل کی قیمت میں 32 روپے اور بجلی کی قیمت میں 16 روپے کمی ہوئی۔ انہوں نے کہا کہ اگر حکومت نے عوام کو ریلیف نہ دیا تو دھرنوں کا دائرہ مزید وسیع کیا جا سکتا ہے۔
امیر جماعت اسلامی نے تمام اپوزیشن جماعتوں سے تحریک میں ساتھ دینے کا مطالبہ کرتے ہوئے کہا کہ جماعت اسلامی پرامن ہے اور حکومت سے مطالبہ ہے کہ پاکستانی عوام کی زندگی آسان بنائی جائے اور پٹرولیم لیوی ختم کی جائے۔
کراچی میں انتظامی یونٹس کے معاملے پر انہوں نے کہا کہ فیصلے آئین اور عوام کی رائے کے مطابق ہونے چاہئیں۔ پیپلز پارٹی اور ایم کیو ایم کو سندھی مہاجر تقسیم پیدا کرنے اور نورا کشتی سے گریز کرنا چاہیے۔
