لاہور( پاک ترک نیوز) خوشیوں،محبت اور شکرانے کا دن آ گیا ۔۔ ملک بھر میں عید الفطر مذہبی جوش وخروش اور عقیدت کے ساتھ منائی جا رہی ہے ،ملک بھر کی مساجد میں نماز عید کے اجتماعات ہوئے ،ملکی سلامتی،ترقی اور امت مسلملہ کے اتحاد کے لیے خصوصی دعائیں کی گئیں ،،عید کے پہلے دن کی خوشیوں اور روایتی سرگرمیوں پر مبنی یہ رپورٹ دیکھیے۔
ملک بھر کے تمام چھوٹے بڑے شہروں میں نمازِ عید کے بڑے اجتماعات ہوئے جہاں علمائے کرام نے اپنے خطبات میں صبر، اخوت اور اتحاد کا پیغام دیا۔نماز عید کے بعد شہریوں نے ایک دوسرے کو گلے لگا کر عید کی مبارکباد دی اور خوشیوں کا اظہار کیا
بچوں کے لیے عید کا دن کسی تہوار سے کم نہیں ہوتا ۔۔۔عید کی خوشیاں بچوں کے لیے خاص طور پر یادگار ہوتی ہیں۔بچے نئے کپڑے پہن کر پارکوں اور تفریحی مقامات کا رخ کرتے ہیں جبکہ بڑوں سے عیدی وصول کرتے ہیں۔
گھروں میں مہمانوں کی آمد کا سلسلہ جاری ہے جہاں روایتی پکوان اور خاص طور پر میٹھی سویاں پیش کی جا رہی ہیں۔دوپہر اور رات کے وقت کے لیے بار بی کیو ،چکن پلاؤ ،ہانڈی اور چکن کڑاہی کے خصوصی انتظامات کیے گئے ۔
شہر کے پارکس، تفریحی مقامات اور بازاروں میں بھی شہریوں کی بڑی تعداد موجود ہے جو عید کی خوشیاں اپنے اہل خانہ اور دوستوں کے ساتھ منا رہے ہیں۔ملک بھر میں عید کے پہلے دن خوشیوں اور مسرت کا ماحول ہے اور شہری اپنے پیاروں کے ساتھ اس خوشی کے موقع کو بھرپور طریقے سے منا رہے ہیں۔
