قاہرہ (پاک ترک نیوز )مصر نے بحیرہ روم میں قدرتی گیس کے نئے ذخائر دریافت کرنے کا اعلان کردیا، ابتدائی اندازوں کے مطابق نئے ذخیرے میں تقریباً 200 ارب مکعب فٹ گیس موجود ہے۔
مصری وزارت پیٹرولیم و معدنی وسائل کے مطابق یہ دریافت طیبہ کنسیشن کے علاقے میں واقع تحقیقی کنویں ’’نسیم ون ایکس‘‘ میں ڈرلنگ اور جائزے کے دوران سامنے آئی۔
وزارت کے مطابق کنویں میں تقریباً 15 میٹر موٹی گیس بردار تہہ دریافت ہوئی ہے، جس میں گیس کے موجود ہونے کی واضح علامات سامنے آئی ہیں۔
حکام کا کہنا ہے کہ اس دریافت سے حاصل ہونے والی قابل استعمال گیس کی اصل مقدار، روزانہ پیداوار کی صلاحیت اور تجارتی افادیت کا تعین کرنے کے لیے تکنیکی اور ذخائر سے متعلق مطالعات جاری ہیں۔
مصر نے نئے کنویں کو موجودہ پیداواری نظام سے منسلک کرنے کے لیے تقریباً 22 کلومیٹر طویل پائپ لائن بچھانے کا منصوبہ بنایا ہے۔
یہ پائپ لائن کنویں کو ابو مادی اور الجمیل گیس پائپ لائن سے منسلک کرے گی، جس سے پہلے سے موجود بنیادی ڈھانچے کو استعمال کرتے ہوئے پیداوار شروع کرنے کا وقت کم کیا جاسکے گا۔
اس منصوبے میں اٹلی کی توانائی کمپنی اینی اور آسٹریلیا کی ووڈ سائیڈ شراکت دار ہیں، جبکہ ڈرلنگ کا کام مصری کمپنی پیٹروبیل نے انجام دیا۔
مصری وزارت پیٹرولیم کے مطابق ملک میں سرمایہ کاری اور تیل و گیس کی تلاش کی سرگرمیوں میں اضافے کے باعث مثبت نتائج سامنے آرہے ہیں۔
یہ بھی پڑھیں: صومالیہ نے صومالی لینڈ میں اسرائیلی سفارت خانہ قائم کرنے کا منصوبہ غیر قانونی قراردیدیا
حکومت نے توانائی کے شعبے میں کام کرنے والی غیر ملکی کمپنیوں کے واجبات کی ادائیگی میں پیش رفت اور سرمایہ کاری کے بہتر ماحول کو بھی اہم قرار دیا ہے۔
مصر گزشتہ چند برسوں کے دوران مقامی گیس کی پیداوار میں کمی کے باعث درآمدی گیس پر انحصار بڑھانے پر مجبور ہوا ہے۔
