واشنگٹن ( پاک ترک نیوز) امریکی صدر ڈونلڈ ٹرمپ نے ایران کے ساتھ جنگ کو عملاً ختم قرار دیتے ہوئے مزید فوجی کارروائی نہ کرنے کا اشارہ دے دیا۔ اعتراف کیا ہے کہ ایران جنگ نے امریکا کو نقصان پہنچایا اور وسط مدتی انتخابات میں ری پبلکنز کی شکست کی اہم وجوہات میں سے ایک بنی۔امریکی نشریاتی ادارے کو انٹرویو میں صدر ٹرمپ نے کہا کہ ایران کے ساتھ جنگ کو مزید وسعت دینے کی کوئی وجہ نہیں، نہ ہی ان کا ایسا کرنے کا ارادہ ہے۔ ایران کے ساتھ مذاکرات میں مثبت پیش رفت ہو رہی ہے اور تہران کے خلاف دوبارہ حملوں کا امکان کم ہے۔ٹرمپ کا کہنا تھا کہ ایران کو جوہری ہتھیار حاصل کرنے کی اجازت نہیں دی جا سکتی، ایرانی قیادت بھی جانتی ہے کہ اسے امریکی شرائط تسلیم کرنا ہوں گی۔ تاہم صورتحال تبدیل ہوئی تو امریکا مکمل فوجی کارروائی کے لیے تیار ہے۔امریکی صدر نے اعتراف کیا کہ ایران جنگ کے علاوہ بڑھتی ہوئی ایندھن کی قیمتیں، اسرائیل مخالف جذبات اور سخت امیگریشن پالیسی بھی انتخابات میں ری پبلکنز کی شکست کی وجوہات بنیں۔ ان کا دعویٰ تھا کہ ایران کے جوہری پروگرام کو روکنے کے لیے حملوں کا فیصلہ تاریخی اعتبار سے درست ثابت ہوگا۔
یہ بھی پڑھیں: مصر میں بحیرہ روم کے سمندر میں گیس کے بڑے ذخائر دریافت
ٹرمپ نے وائٹ ہاؤس میں قطری وزیراعظم سے ملاقات کو بھی مثبت قرار دیا۔ ان کے مطابق ایران کی صورتحال پر تفصیلی تبادلہ خیال ہوا، جبکہ قطر، سعودی عرب اور دیگر خلیجی ممالک موجودہ صورتحال برقرار رکھنے کے حامی ہیں۔دوسری جانب قطری وزیراعظم شیخ محمد بن عبدالرحمان بن جاسم آل ثانی نے کہا ہے کہ قطر کسی معاہدے تک پہنچنے اور خطے میں امن کے قیام کے لیے مثبت مذاکرات کو اہمیت دیتا ہے۔
