لاہور( پاک ترک نیوز) پنجاب کے تمام 9 تعلیمی بورڈز نے ڈیجیٹل رزلٹ کارڈ سسٹم متعارف کرانے کی منظوری دے دی۔نئے نظام کے تحت طلبہ کے امتحانی ریکارڈ اور دیگر تعلیمی سہولیات کو آن لائن کیا جائے گا، جبکہ مرحلہ وار روایتی پرنٹ شدہ رزلٹ کارڈز کا اجرا بھی ختم کر دیا جائے گا۔
پہلے مرحلے میں نویں جماعت اور فرسٹ ایئر کے طلبہ کو سالانہ امتحانات کے نتائج کے ڈیجیٹل رزلٹ کارڈز فراہم کیے جائیں گے۔
یہ بھی پڑھیں: پنجاب میں مزید 555 سرکاری اسکول بند یا ضم کرنے کا فیصلہ
ریگولر اور پرائیویٹ دونوں امیدوار نتائج کے اعلان کے فوراً بعد اپنے رزلٹ کارڈز آن لائن حاصل کر سکیں گے۔ ریگولر طلبہ اپنے متعلقہ تعلیمی اداروں کے آن لائن پورٹل سے رزلٹ کارڈ ڈاؤن لوڈ کر سکیں گے، جبکہ پرائیویٹ امیدوار متعلقہ تعلیمی بورڈ کی ویب سائٹ سے براہِ راست رزلٹ کارڈ حاصل کر سکیں گے۔
ڈیجیٹل رزلٹ کارڈ پر کیو آر کوڈ سمیت دیگر سکیورٹی فیچرز موجود ہوں گے، جن کی مدد سے تعلیمی ادارے، ملازمت فراہم کرنے والے ادارے اور دیگر متعلقہ محکمے دستاویز کی تصدیق الیکٹرانک طریقے سے کر سکیں گے۔
حکام کے مطابق ڈیجیٹل رزلٹ کارڈ کو روایتی رزلٹ کارڈ کے برابر سرکاری حیثیت حاصل ہوگی۔ طلبہ اسے کالج اور یونیورسٹی میں داخلوں، ملازمتوں، اسکالرشپس، ایکویویلنس سرٹیفکیٹس، دستاویزات کی تصدیق اور دیگر سرکاری امور کے لیے استعمال کر سکیں گے۔
نئے نظام سے طلبہ کو رزلٹ کارڈ کے حصول کے لیے بورڈ دفاتر کے چکر نہیں لگانا پڑیں گے اور نہ ہی پرنٹ شدہ دستاویز کے انتظار کی ضرورت ہوگی۔
