پنجاب میں میٹرک اور انٹر کے امتحانات، بائیومیٹرک حاضری اور ڈیجیٹل نگرانی لازمی

لاہور:(پاک ترک نیوز)پنجاب میں 2026 کے میٹرک اور انٹرمیڈیٹ کے سالانہ امتحانات دینے والے تمام طلبہ کے لیے ڈیجیٹل بائیومیٹرک حاضری کی تصدیق لازمی قرار دے دی گئی ہے۔
اس فیصلے کے تحت امتحانی مراکز میں داخلے سے قبل ہر طالب علم کی شناخت بائیومیٹرک نظام کے ذریعے تصدیق کی جائے گی۔یہ فیصلہ بورڈ آف انٹرمیڈیٹ اینڈ سیکنڈری ایجوکیشن لاہور میں منعقد ہونے والے ایک اعلیٰ سطح اجلاس میں زیرِ غور آیا، جہاں امتحانی نظام کو جدید خطوط پر استوار کرنے کے لیے وسیع اصلاحات پر تبادلہ خیال کیا گیا۔
حکام کے مطابق بائیومیٹرک تصدیق کا مقصد یہ یقینی بنانا ہے کہ صرف رجسٹرڈ اور مستند امیدوار ہی امتحان میں بیٹھ سکیں، جبکہ جعلی امیدواروں کا داخلہ مکمل طور پر روکا جا سکے۔
نئے مجوزہ نظام کے تحت عملی امتحانات کو تھیوری پیپرز کی طرح سخت نگرانی اور جانچ کے عمل سے گزارا جائے گا۔ تمام بورڈز میں یکساں مارکنگ کے لیے معیاری تشخیصی معیار متعارف کرانے پر بھی غور کیا گیا۔
مزید شفافیت کے لیے عملی امتحانات کے دوران لیبارٹریز میں سی سی ٹی وی کیمرے نصب کرنے کی تجویز دی گئی ہے، تاکہ نقل، بیرونی مداخلت اور سفارش کے کلچر کا خاتمہ کیا جا سکے۔
حکام نے ڈیجیٹل مارکنگ سسٹم متعارف کرانے پر بھی غور کیا، جس کے تحت تھیوری اور عملی امتحانات کے نمبرز الیکٹرانک طریقے سے درج کیے جائیں گے۔
اس نظام سے ٹیمپرنگ، انسانی غلطیوں اور ریکارڈ میں ردوبدل کے امکانات کم ہوں گے۔اجلاس میں امتحانی عملے اور سپروائزروں کے معاوضے بڑھانے کی تجویز بھی زیر بحث آئی۔