اسلام آباد ( پاک ترک نیوز) پاکستان میں طلبا کے لیے بڑی آسانی پیدا کر دی گئی ۔ہائر ایجوکیشن کمیشن نے تعلیمی اسناد کی تصدیق کے لیے ایک جدید ڈیجیٹل نظام متعارف کرانے کا فیصلہ کیا ہے، جس کے بعد طلبا کو دفاتر کے چکر لگانے سے نجات مل جائے گی۔مزید تفصیلات اس رپورٹ میں۔
تعلیمی اسناد کی تصدیق کے لیے لمبی قطاریں، وقت کا ضیاع اور دفاتر کے چکر ۔۔۔اب یہ سب ماضی کا حصہ بننے جا رہا ہے۔ہائر ایجوکیشن کمیشن نے ایک مکمل ڈیجیٹل ڈگری اٹیسٹیشن سسٹم متعارف کرانے کا اعلان کیا ہے، جس کا مقصد تصدیقی عمل کو تیز، شفاف اور صارف دوست بنانا ہے۔اس نئے نظام کے تحت طلبا کو اپنے کاغذات جمع کرانے کے لیے کسی دفتر جانے کی ضرورت نہیں ہوگی، بلکہ درخواست سے لے کر تصدیق تک کا پورا عمل آن لائن مکمل کیا جائے گا۔
نئے طریقے کے مطابق فزیکل ڈاکومنٹس جمع کرانے کی ضرورت نہیں ہو گی ،آن لائن اپلائی ،ٹریکنگ اور ویری فکیشن ہو سکے گی،ملک بھر کے طلبا کو یکساں سہولت میسر آئے گی ،وقت اور اخراجات میں نمایاں کمی ہو گی،شفافیت اور ڈیٹا سکیورٹی میں بہتری آئے گی ۔
ذرائع کے مطابق اس جدید نظام پر تیزی سے کام جاری ہے اور اسے تیس جون دو ہزار چھبیس تک فعال کیا جائے گا۔
ماہرین تعلیم کا کہنا ہے کہ یہ اقدام نہ صرف طلبا کے لیے آسانی پیدا کرے گا بلکہ اداروں کے درمیان ڈیٹا شیئرنگ کو بھی مؤثر بنائے گا۔
طلبا نے اس فیصلے کو خوش آئند قرار دیتے ہوئے کہا ہے کہ اب ہمیں لمبی لائنوں اور سفارش کے بغیر اپنے کام کروانے میں آسانی ہوگی۔
