راولپنڈی(پاک ترک نیوز ) دادوچہ ڈیم سے پانی کی فراہمی کے منصوبے پر کام تیز کرنے کے لیے پانی صاف کرنے کے پلانٹ کی تعمیر اور تنصیب کے لیے 25 ایکڑ نجی زمین حاصل کرنے کا فیصلہ کرلیا گیا۔متعلقہ حکام کے مطابق مطلوبہ اراضی پر دفعہ چار نافذ کردی گئی ہے، جبکہ زمین کی قیمت کے تعین کے لیے ضلعی قیمت تشخیصی کمیٹی کو درخواست بھی ارسال کردی گئی ہے۔دادوچہ ڈیم واٹر سپلائی منصوبے کے تحت راولپنڈی شہر اور چھاؤنی کو روزانہ ساڑھے تین کروڑ گیلن پانی فراہم کیا جائے گا، جو دونوں علاقوں میں برابر تقسیم ہوگا۔ منصوبہ 2029 تک مکمل کرنے کا ہدف مقرر کیا گیا ہے۔
منصوبے کے تحت ڈیم کے علاوہ 28 کلومیٹر طویل پانی کی ترسیلی لائن، پانی صاف کرنے کا پلانٹ، پمپنگ اسٹیشن، پانی کی تقسیم کا نظام اور ترسیلی ڈھانچہ تعمیر کیا جائے گا، جس پر مجموعی طور پر 36 ارب روپے لاگت آئے گی۔دادوچہ ڈیم کی تعمیر پنجاب محکمہ آبپاشی کی جانب سے جاری ہے اور منصوبے کا 94 فیصد کام مکمل ہوچکا ہے۔ترقیاتی منصوبہ بندی کے صوبائی فورم نے 28 کلومیٹر ترسیلی لائن، پانی صاف کرنے کے پلانٹ اور تقسیم آب کے نظام پر مشتمل منصوبے کی ابتدائی لاگت 36 ارب روپے منظور کرلی ہے۔حکام کے مطابق منصوبے کی 36 ارب روپے کی لاگت راولپنڈی شہر اور چھاؤنی کے درمیان برابر تقسیم کی جائے گی۔
یہ بھی پڑھیں: ملائیشیا سے میانمار کے پناہ گزینوں کی واپسی،انسانی حقوق تنظیموں کی تنقید
پانی صاف کرنے کے پلانٹ، پانی کی تقسیم اور پمپنگ نظام کی تعمیر کے لیے کاک پل کے قریب 25 ایکڑ نجی زمین کی نشاندہی کی گئی ہے، جس کے حصول کا عمل دفعہ چار کے نفاذ کے بعد شروع کردیا گیا ہے۔نجی اراضی کی قیمت ضلعی قیمت تشخیصی کمیٹی طے کرے گی، جبکہ واسا نے زمین کی قیمت کے تعین کے لیے کمیٹی کو باقاعدہ درخواست بھی جمع کرا دی ہے۔
