راولپنڈی ( پاک ترک نیوز) صوبائی ترقیاتی ورکنگ پارٹی نے راولپنڈی میں پانی کی قلت پر قابو پانے کے لیے ددوچہ ڈیم واٹر سپلائی منصوبے کے 36 ارب روپے کے پی سی ون کی منظوری دے دی۔
منصوبے کے تحت راولپنڈی شہر اور کینٹونمنٹ کو روزانہ 3 کروڑ 50 لاکھ گیلن اضافی پانی فراہم کیا جائے گا۔منصوبے کے مطابق دادوچہ ڈیم سے پانی 28 کلومیٹر طویل پائپ لائن کے ذریعے راولپنڈی منتقل کیا جائے گا، جبکہ پانی کی صفائی کے لیے فلٹریشن پلانٹس بھی نصب کیے جائیں گے۔اس کے علاوہ راولپنڈی شہر اور کینٹونمنٹ کے مختلف علاقوں تک پانی پہنچانے کے لیے نیا ڈسٹری بیوشن نیٹ ورک بھی تیار کیا جائے گا۔
منصوبے کی مجموعی لاگت 36 ارب روپے مقرر کی گئی ہے، جس میں راولپنڈی شہر اور کینٹونمنٹ کا حصہ برابر یعنی 18،18 ارب روپے رکھا گیا ہے۔تاہم کینٹونمنٹ کے 18 ارب روپے کے حصے کی رقم وفاقی حکومت ادا کرے گی یا پنجاب حکومت، اس کا فیصلہ صوبائی کابینہ کرے گی۔اضافی فراہم کیے جانے والے 3 کروڑ 50 لاکھ گیلن یومیہ پانی کی راولپنڈی شہر اور کینٹونمنٹ کے درمیان حتمی تقسیم کا فیصلہ بھی صوبائی کابینہ کرے گی۔
یہ بھی پڑھیں: غم زدہ ڈولفن کی دردناک کہانی، مردہ بچے کو کئی روز تک اپنے ساتھ لیے رہی
ددوچہ ڈیم کی تعمیر پنجاب محکمہ آبپاشی کے تحت پہلے ہی جاری ہے، جبکہ ڈیم سے راولپنڈی تک پانی پہنچانے کے لیے پائپ لائن اور سپلائی نیٹ ورک واسا تیار کرے گا۔حکام کے مطابق منصوبہ مکمل ہونے کے بعد راولپنڈی شہر اور کینٹونمنٹ میں پانی کی شدید قلت پر قابو پانے میں مدد ملے گی اور شہریوں کو پانی کی فراہمی میں نمایاں بہتری آنے کی توقع ہے۔
