لاہور( پاک ترک نیوز) لاہور میں ٹریفک قوانین کی خلاف ورزی اور ای چالان ادا نہ کرنے والوں کے خلاف بڑا کریک ڈاؤن شروع کردیا گیا۔
چیف ٹریفک آفیسر سید عبد الرحیم شیرازی نے سب سے زیادہ جرمانوں کے نادہندہ 100 گاڑیوں کو پکڑنے کا حکم دے دیا۔ سیف سٹی حکام کی مدد سے گاڑیوں کا سراغ لگا کر انہیں تحویل میں لیا جائے گا۔
لاہور کے چیف ٹریفک آفیسر سید عبد الرحیم شیرازی نے ای چالان کے ٹاپ 100 نادہندگان کے خلاف کارروائی کی ہدایت کردی۔
ٹریفک پولیس کی ٹیمیں سیف سٹی حکام کے تعاون سے ان گاڑیوں کا سراغ لگائیں گی اور واجب الادا جرمانے ادا نہ کرنے والی گاڑیوں کو قبضے میں لیا جائے گا۔
کریک ڈاؤن کے دوران ٹریفک پولیس نے ٹاپ 10 ای چالان نادہندگان میں شامل ایک پک اپ ڈرائیور کو گرفتار کرلیا۔
پولیس کے مطابق ڈرائیور نے ٹریفک قوانین کی 80 مرتبہ خلاف ورزی کی، جس پر اس کے ذمہ 4 لاکھ 10 ہزار روپے سے زائد کے جرمانے عائد ہوئے۔
پولیس کا کہنا ہے کہ واجب الادا ای چالانوں کا علم ہونے کے بعد ڈرائیور نے گاڑی پر مبینہ طور پر جعلی نمبر پلیٹ لگا دی۔
پولیس کے مطابق جعلی نمبر پلیٹ لگانے کے بعد بھی گاڑی کی جانب سے ٹریفک قوانین کی خلاف ورزیاں جاری رہیں، جس کے نتیجے میں جعلی رجسٹریشن نمبر کے خلاف مزید 21 ہزار روپے کے ای چالان جاری ہوئے۔
یہ بھی پڑھیں: غیر قانونی اور غیر رجسٹرڈ ڈرائیونگ سکولز کےخلاف کارروائی
ٹریفک پولیس نے ڈرائیور کو گاڑی سمیت گرفتار کرکے نواں کوٹ تھانے میں جعلی نمبر پلیٹ استعمال کرنے پر مقدمہ درج کرلیا۔
حکام کے مطابق گرفتار ڈرائیور کو واجب الادا تمام ای چالان جرمانے بھی ادا کرنا ہوں گے۔چیف ٹریفک آفیسر سید عبد الرحیم شیرازی کا کہنا ہے کہ ای چالان اسکواڈز کو ٹاپ 100 نادہندہ گاڑیوں کی فہرست فراہم کردی گئی ہے۔
ٹریفک پولیس ٹیموں کو سیف سٹی اتھارٹی کے ساتھ مل کر ان گاڑیوں کا سراغ لگانے اور قانون کے مطابق کارروائی کرنے کی ہدایت کی گئی ہے۔
