لاہور( پاک ترک نیوز) سی ٹی او لاہور سید عبدالرحیم شیرازی نے غیر قانونی اور غیر رجسٹرڈ ڈرائیونگ اسکولز کے خلاف کریک ڈاؤن کا حکم دیدیا۔
موٹر وہیکل رولز 1969 سیکشن 23 کے مطابق ڈرائیونگ اسکولز کے لیے قانونی تقاضوں پر عملدرآمد لازمی قرار دیا گیا ۔
سی ٹی او لاہور کا کہنا ہے کہ آج سے بغیر رجسٹریشن اور بغیر اجازت کوئی بھی پرائیویٹ ڈرائیونگ سکول نہیں چلےگا، رجسٹریشن کےلئے ڈرائیونگ اسکولز موٹروئیکل رولز 1969 سے مشروط ہے۔
سید عبدالرحیم شیرازی کا مزید کہنا تھا کہ گاڑی میں ڈوئل پیڈل کنٹرول، باقاعدہ عمارت اور کلاس روم کا ہونا ضروری ہے، تربیت یافتہ اور مستند انسٹرکٹرز کے بغیر ڈرائیونگ کی تربیت دینے کی اجازت نہیں ہوگی۔
سی ٹی او لاہورکا کہنا تھا کہ مقررہ قواعد و ضوابط پر پورا اترنے والے ڈرائیونگ اسکولز ہی کام کر سکیں گے، رجسٹرڈ ڈرائیونگ سکولز شہریوں سے مناسب اور منظور شدہ فیس ہی وصول کرنے کے پابند ہونگے۔
یہ بھی پڑھیں:دنیا کے سب سے برے اور سب سے اچھے قید خانے کہاں ہیں؟
سید عبدالرحیم شیرازی نے کہا کہ لاہور ٹریفک پولیس شہریوں کو معیاری اور محفوظ ڈرائیونگ ٹریننگ کی فراہمی یقینی بنائے گی۔شہری ڈرائیونگ کی تربیت صرف قانون کے مطابق رجسٹرڈ اور منظور شدہ اداروں سے حاصل کریں۔محفوظ ڈرائیونگ کلچر کے فروغ اور شہریوں کے تحفظ کے لیے قوانین پر سختی سے عملدرآمد جاری رہے گا
