وزیراعلیٰ پنجاب مریم نواز کیخلاف توہین عدالت کی درخواست دائر

لاہور( پاک ترک نیوز) وزیر اعلیٰ پنجاب مریم نواز اور صوبائی وزیر اطلاعات عظمیٰ بخاری کے خلاف لاہور ہائیکورٹ میں توہینِ عدالت کی درخواست دائر کر دی گئی ہے۔
درخواست شہری منیر احمد کی جانب سے اظہر صدیق ایڈووکیٹ کی وساطت سے لاہور ہائیکورٹ میں جمع کرائی گئی۔
درخواست میں مؤقف اختیار کیا گیا ہے کہ پنجاب پراپرٹی آرنرشپ ایکٹ سے متعلق عدالتی حکم پر وزیراعلٰی پنجاب اور عظمیٰ بخاری کی جانب سے دیے گئے تنقیدی بیانات توہینِ عدالت کے زمرے میں آتے ہیں۔
درخواست میں کہا گیا ہے کہ پراپرٹی قانون کی معطلی سے متعلق بیانات کے باعث عدلیہ کی ساکھ متاثر ہوئی ہے اور وزیراعلیٰ پنجاب کے بیانات سے عدالت کو متنازع بنانے کی کوشش کی گئی۔عدالتی حکم کو لینڈ مافیا کے حق میں قرار دینا ایک سنگین الزام ہے، جبکہ لاہور ہائیکورٹ کے فیصلے کو سیاسی رنگ دینا بھی غیر قانونی عمل ہے۔
درخواست میں یہ بھی مؤقف اپنایا گیا ہے کہ اعلیٰ عہدیداران کی جانب سے اس نوعیت کے بیانات عدالتی عمل کو متاثر کر سکتے ہیں، جو آئین اور قانون کے منافی ہے۔
درخواست گزار نے عدالت سے استدعا کی ہے کہ وزیراعلیٰ پنجاب مریم نواز اور عظمیٰ بخاری کو توہینِ عدالت کا شوکاز نوٹس جاری کیا جائے اور ان کے خلاف توہینِ عدالت کی کارروائی عمل میں لائی جائے۔