بیجنگ ( پاک ترک نیوز) چین نے ایک بار پھر دنیا کو اپنی جدید انفراسٹرکچر طاقت سے حیران کر دیا۔۔۔ چونگ چنگ ایسٹ ریلوے اسٹیشن، جسے دنیا کے جدید ترین اور بڑے ہائی اسپیڈ ریلوے حب میں شمار کیا جا رہا ہے، سوشل میڈیا پر توجہ کا مرکز بن گیا۔۔۔ دنیا کے امیر ترین شخص ایلون مسک نے بھی اس اسٹیشن کی ویڈیو شیئر کر دی، جس کے بعد یہ منصوبہ عالمی خبروں میں چھا گیا۔
جنوب مغربی چین کے شہر چونگ چنگ میں قائم چونگ چنگ ایسٹ ریلوے اسٹیشن جدید انجینئرنگ کا شاہکار قرار دیا جا رہا ہے۔۔۔ آٹھ منزلوں پر مشتمل یہ عظیم الشان اسٹیشن بارہ لاکھ سے زائد مربع میٹر رقبے پر پھیلا ہوا ہے، جو تقریباً ایک سو ستر فٹبال گراؤنڈز کے برابر بنتا ہے۔
اس اسٹیشن کی شیشے سے ڈھکی وسیع چھت، جدید ڈیزائن اور خودکار سفری نظام اسے مستقبل کے ٹرانسپورٹ حب کی شکل دیتے ہیں۔
چینی خبر رساں ادارے کے مطابق اسٹیشن میں پندرہ پلیٹ فارمز اور انتیس ریلوے ٹریکس موجود ہیں، جبکہ یہ ہر گھنٹے میں سولہ ہزار مسافروں کو سنبھالنے کی صلاحیت رکھتا ہے۔
یہ اسٹیشن چونگ چنگ-شیامن ہائی اسپیڈ ریلوے لائن کا اہم حصہ ہے، جہاں ٹرینیں تین سو پچاس کلومیٹر فی گھنٹہ کی رفتار سے سفر کر سکتی ہیں۔
چونگ چنگ ایسٹ ریلوے اسٹیشن کو صرف ریلوے اسٹیشن نہیں بلکہ ایک مکمل فور ڈائمینشنل ٹرانسپورٹ حب کہا جا رہا ہے۔۔۔ یہاں ہائی اسپیڈ ٹرینوں کے ساتھ میٹرو، بسیں، ٹیکسیاں اور لانگ روٹ کوچ سروسز بھی ایک ہی مقام پر دستیاب ہیں۔
ماہرین کے مطابق اس مربوط نظام سے مسافروں کے سفر کا وقت کم اور سہولت میں اضافہ ہوگا۔
ارب پتی بزنس مین ایلون مسک کی جانب سے شیئر کی گئی ویڈیو کو کروڑوں افراد دیکھ چکے ہیں۔۔۔ سوشل میڈیا صارفین نے اسے مستقبل کا ریلوے اسٹیشن” قرار دیا، جبکہ کئی لوگوں نے چین کے انفراسٹرکچر ماڈل کو دنیا کے لیے مثال کہا۔
پہاڑوں کے درمیان بسے چونگ چنگ شہر کو پہلے ہی “سائبر پنک سٹی” کہا جاتا تھا۔۔۔ اور اب یہ جدید ترین ریلوے اسٹیشن چین کے تیز رفتار ترقیاتی وژن کی نئی پہچان بنتا دکھائی دے رہا ہے۔
