پیرس (پاک ترک نیوز) یورپی فٹبال کی گورننگ باڈی یوئیفا اور یورپی قومی فٹبال ایسوسی ایشنز کے نمائندوں نے فیفا میں جاری بحران پر شدید تحفظات کا اظہار کرتے ہوئے بنیادی اصلاحات اور نئی قیادت کا مطالبہ کردیا۔موناکو میں 2026-27 یوئیفا کلب مقابلوں کے ڈراز کے موقع پر ہونے والے اجلاس میں فیفا کے صدر کی جانب سے فیفا ورلڈ کپ میں بیرونی سرمایہ کاروں کو حصہ فروخت کرنے کی ناکام کوشش پر تفصیلی غور کیا گیا۔اجلاس میں اس اقدام کو صدارتی اختیارات کے غلط استعمال، ناقص فیصلہ سازی اور فٹبال کی عالمی تنظیم کی اعلیٰ ترین قیادت کے لیے ناموزوں طرز حکمرانی قرار دیا گیا۔
شرکا نے متفقہ طور پر یوئیفا کے صدر اور انتظامیہ کو ادارتی، سیاسی اور قانونی تمام ممکنہ راستے اختیار کرنے کا مینڈیٹ دے دیا تاکہ فیفا میں بنیادی اصلاحات، صدارتی اختیارات کی حدود اور ادارہ جاتی طرز حکمرانی یقینی بنائی جاسکے۔یوئیفا نے مطالبہ کیا کہ فیفا فارورڈ انٹرپرائز منصوبے کا مکمل طور پر آزاد بیرونی جائزہ لیا جائے اور متعلقہ دستاویزات، رابطوں اور فیصلوں تک مکمل رسائی دی جائے۔ یوئیفا کا کہنا ہے کہ فیفا خود اپنے معاملات کی تحقیقات کرکے عالمی فٹبال برادری سے نتائج قبول کرنے کی توقع نہیں کرسکتا۔
یہ بھی پڑھیں: موبائل صارفین کے لیے بڑی خوشخبری، ہر ری چارج کا بیلنس 180 دن تک محفوظ رہے گا
بیان میں کہا گیا کہ بحران نے فیفا کے صدر کے عہدے کے لیے درکار اعتماد کو شدید نقصان پہنچایا ہے اور صرف ایک متنازع تجویز واپس لینے یا اصلاحات کے وعدے کرنے سے یہ اعتماد بحال نہیں ہوسکتا، عالمی فٹبال کو اعتماد بحال کرنے والی نئی قیادت کی ضرورت ہے۔یوئیفا نے واضح کیا کہ اگر موجودہ فیفا صدر دوبارہ عہدے کے لیے امیدوار بنتے ہیں تو یورپی فٹبال دیگر کنفیڈریشنز کے ساتھ مل کر رکن ایسوسی ایشنز کے سامنے ایک قابلِ اعتبار متبادل امیدوار لانے کے لیے کام کرے گا۔
