کراچی ( پاک ترک نیوز) کراچی میں قومی مرکز برائے سائبر جرائم کے حکام نے بڑی کارروائی کرتے ہوئے غیر ملکی شہریوں سے مبینہ فراڈ کرنے والے کال سینٹر کا سراغ لگا لیا، کارروائی کے دوران کال سینٹر کے دو مالکان سمیت سات ملزمان کو گرفتار کرلیا گیا۔
حکام کے مطابق کارروائی ملیر کے علاقے کوثر ٹاؤن میں قائم مبینہ فراڈ کال سینٹر پر کی گئی۔ گرفتار ملزمان میں بلال رضا، عبداللہ، شعیب رحیم، عمر سعید، جنید خان، محمد نجم اور حسن مختار شامل ہیں۔قومی مرکز برائے سائبر جرائم کے مطابق ملزمان خود کو غیر ملکی بینکوں کے افسران ظاہر کرکے شہریوں سے رابطہ کرتے تھے اور دھوکے سے متاثرین کی حساس ذاتی اور مالی معلومات حاصل کرتے تھے۔حکام کا کہنا ہے کہ ملزمان ڈیبٹ اور کریڈٹ کارڈز کی معلومات حاصل کرکے مبینہ طور پر فراڈ میں استعمال کرتے تھے۔
چھاپے کے دوران متعدد لیپ ٹاپ اور موبائل فون بھی برآمد کیے گئے، جنہیں مزید فرانزک تجزیے کے لیے تحویل میں لے لیا گیا ہے۔حکام کے مطابق کارروائی کا مقدمہ نمبر 83/26 درج کرلیا گیا ہے، جس میں پیکا 2025 اور تعزیرات پاکستان کی مختلف دفعات شامل کی گئی ہیں۔قومی مرکز برائے سائبر جرائم کے مطابق فراڈ نیٹ ورک سے وابستہ دیگر افراد کی شناخت اور گرفتاری کے لیے کارروائیاں جاری ہیں، جبکہ گرفتار ملزمان سے مزید تفتیش بھی کی جا رہی ہے۔
ایڈیشنل ڈائریکٹر قومی مرکز برائے سائبر جرائم طارق نواز کے مطابق گرفتار ملزمان سے تفتیش کے دوران نیٹ ورک کے مزید ارکان اور مبینہ فراڈ کے طریقہ کار سے متعلق اہم معلومات سامنے آنے کی توقع ہے۔
