بسنت کی تیاریوں میں تیزی، سرکاری سکولوں کی چھتیں نیلام کرنے کا فیصلہ

لاہور:(پاک ترک نیوز)لاہور میں بسنت کی تیاریوں کا آغاز ہو چکا ہے، جہاں ضلعی تعلیم اتھارٹی (ڈی ای اے) نے بسنت سے متعلق تقریبات کے لیے متعدد سرکاری اسکولوں کی چھتیں نیلام کرنے کا فیصلہ کیا ہے۔
ذرائع کے مطابق اس منصوبے کی تیاری میں ضلعی انتظامیہ اور والڈ سٹی اتھارٹی کو بھی شامل کیا گیا ہے۔ حکام کا کہنا ہے کہ اسکولوں کی چھتوں کی نیلامی کا عمل سیکرٹری تعلیم کی منظوری کے بعد شروع کیا جائے گا۔
مجوزہ منصوبے کے تحت جن سرکاری اسکولوں کی چھتیں بسنت کی تقریبات کے لیے نیلام کی جائیں گی، ان میں گورنمنٹ وکٹوریہ گرلز ہائی اسکول، گورنمنٹ ہائی اسکول دہلی گیٹ، گورنمنٹ بوائز اینڈ گرلز ہائی اسکول شیرانوالہ گیٹ، گورنمنٹ اسکول موچی گیٹ، گورنمنٹ اسکول کبلی محل، گورنمنٹ گرلز ہائی اسکول رنگ محل، گورنمنٹ کرشنا ہائی اسکول رنگ محل، گورنمنٹ ماڈل ہائی اسکول تکیہ سادھواں، گورنمنٹ اسکول شیشہ موٹی بازار، گورنمنٹ ہائی اسکول سی ڈی جی ایل بھاٹی گیٹ، عاصفہ ماڈل اسکول شیرانوالہ گیٹ، گورنمنٹ ہائی اسکول چونا منڈی اور گورنمنٹ ہائی اسکول گوالمنڈی شامل ہیں۔علاوہ ازیں لاہور انتظامیہ بیسنت کے موقع پر فروری کے پہلے ہفتے میں چار دن کی تعطیلات دینے کی تجویز پر بھی غور کر رہی ہے۔حکام کے مطابق تعطیلات کا مقصد شہریوں کے رش کو بہتر انداز میں کنٹرول کرنا، ٹریفک دباؤ میں کمی لانا اور بیسنت کو زیادہ محفوظ اور منظم طریقے سے منانے کو یقینی بنانا ہے۔ انتظامیہ کا کہنا ہے کہ اس اقدام سے شہر بھر میں تہوار کے دوران نظم و ضبط برقرار رکھنے میں مدد ملے گی۔