کینبرا(پاک ترک نیوز)آسٹریلیا کے سابق اوپننگ بلے باز ڈیوڈ وارنر نے بال ٹیمپرنگ سینڈ پیپر اسکینڈل پر کپتان پیٹ کمنز کی پریس کانفرنس کے ردعمل میں خاموشی توڑ دی۔ وارنر نے عثمان خواجہ کے الزامات کی حمایت کرتے ہوئے پیٹ کمنز کے مؤقف پر مایوسی کا اظہار کردیا۔
ڈیوڈ وارنر کا کہنا ہے کہ پیٹ کمنز مکمل تیاری کے ساتھ پریس کانفرنس میں آئے تھے، لیکن عثمان خواجہ نے اپنی کتاب میں جو کچھ لکھا ہے، وہ اس کے ساتھ کھڑے ہیں اور ان کے مطابق وہ سچ ہے۔
وارنر نے پیٹ کمنز پر تنقید کرتے ہوئے کہا کہ انہیں ایسا محسوس ہوا جیسے کپتان نے عثمان خواجہ کو بس کے نیچے دھکیل دیا ہو، جس پر انہیں شدید مایوسی ہوئی۔
ڈیوڈ وارنر کا کہنا تھا کہ اس اسکینڈل کی قیمت تین کھلاڑیوں نے ادا کی، جبکہ انہوں نے خود آٹھ سال تک اس معاملے پر بات نہیں کی۔
یہ بھی پڑھیں: پاکستان میں فن ٹیک اور ڈیجیٹل ادائیگیوں کا انقلاب، سرمایہ کاری کے نئے مواقع پیدا
سابق آسٹریلوی کرکٹر نے اپنے مشکل وقت کا ذکر کرتے ہوئے کہا کہ اس دوران انہوں نے اور ان کی اہلیہ نے اپنا بچہ بھی کھو دیا تھا، یہ ان کی زندگی کا انتہائی مشکل دور تھا۔
واضح رہے کہ 2018 کے بال ٹیمپرنگ اسکینڈل میں ڈیوڈ وارنر، اسٹیو اسمتھ اور کیمرون بینکرافٹ کو سزاؤں کا سامنا کرنا پڑا تھا۔ اب عثمان خواجہ کی کتاب میں کیے گئے انکشافات اور پیٹ کمنز کے ردعمل نے آٹھ سال پرانے تنازع کو ایک بار پھر موضوعِ بحث بنا دیا ہے۔
