ہنگو ( پاک ترک نیوز) ہنگو کے علاقے خزینہ بانڈہ چیک پوسٹ پر فتنہ الخوارج دہشتگردوں کے بزدلانہ حملے میں ڈی ایس پی سٹی دیار خان سمیت 10 پولیس جوان جامِ شہادت نوش کر گئے،اٹھائیس زخمی ہوئے ، پولیس کی مؤثر جوابی کارروائی میں 12 سے 15 دہشتگرد ہلاک و زخمی ہوئے ۔
فتنہ الخوارج دہشتگردوں نے بزدلانہ کارروائی کرتے ہوئے پہلے کوارڈ کاپٹر کے ذریعے حملہ کیا، جس کے بعد چیک پوسٹ کا محاصرہ کر لیا۔ چیک پوسٹ پر موجود پولیس جوانوں نے انتہائی بہادری کا مظاہرہ کرتے ہوئے دہشتگردوں کا بھرپور مقابلہ کیا اور آخری دم تک اپنے فرائض انجام دیتے رہے۔
شہید ہونےو الے پولیس اہلکاروں کی نمازِ جنازہ پولیس لائن ہنگو میں سرکاری اعزاز کے ساتھ ادا کی گئی ۔ نمازِ جنازہ کے بعد تمام شہداء کے جسدِ خاکی سرکاری اعزاز کے ساتھ ان کے آبائی علاقوں کی جانب روانہ کر دیے گئے
یہ بھی پڑھیں: امریکہ کے ایران پر ایک بار پھر حملے
آر پی او کوہاٹ کے مطابق پولیس نے جواں مردی کے ساتھ مقابلہ کرتے ہوئے دہشتگردوں کے مذموم عزائم کو خاک میں ملا کر اپنے جانوں کے نذرانے پیش کئے ۔ ہمیں اپنے پولیس جوانوں پر فخر ہے۔
