لاہور( پاک ترک نیوز) لاہور ہائیکورٹ نے بانی پی ٹی آئی کی بہن نورین نیازی کو نیشنل سائبر کرائم انویسٹی گیشن ایجنسی کے مقدمے میں گرفتار کرنے سے روکتے ہوئے ایک ہفتے کی حفاظتی ضمانت منظور کر لی۔
جسٹس سردار اکبر ڈوگر نے نورین نیازی کی درخواست پر سماعت کی۔ عدالت نے حکم دیا کہ نورین نیازی ایک ہفتے کے اندر متعلقہ عدالت سے رجوع کریں اور عبوری ضمانت کے لیے درخواست دائر کریں۔
سماعت کے دوران درخواست گزار کے وکیل نے مؤقف اختیار کیا کہ این سی سی آئی اے نے پیکا ایکٹ کے تحت مقدمہ درج کر رکھا ہے اور خدشہ ہے کہ متعلقہ عدالت سے رجوع کرنے سے پہلے ہی نورین نیازی کو گرفتار کر لیا جائے گا۔
یہ بھی پڑھیں: بانی پی ٹی آئی رہائی فورس کبھی قائم نہیں ہوئی،سہیل آفریدی کا وفاقی آئینی عدالت میں جواب
درخواست میں استدعا کی گئی کہ متعلقہ عدالت سے رجوع کرنے کے لیے حفاظتی ضمانت منظور کی جائے تاکہ قانون کے مطابق عبوری ضمانت کی درخواست دائر کی جا سکے۔
دلائل سننے کے بعد لاہور ہائیکورٹ نے نورین نیازی کی ایک ہفتے کے لیے حفاظتی ضمانت منظور کرتے ہوئے انہیں ہدایت کی کہ مقررہ مدت کے اندر متعلقہ عدالت کے سامنے پیش ہوں۔
