پرتھ ( پاک ترک نیوز) آسٹریلیا نے پہلے ایشز ٹیسٹ میں ٹریوس ہیڈ کی جارحانہ سنچری کی بدولت انگلینڈ کو 8 وکٹوں سے شکست دے دی۔
تفصیلات کے مطابق پرتھ میں جاری ٹیسٹ میچ میں آسٹریلوی ٹیم کو جیت کے لیے 205 رنز کا ہدف ملا جو اس نے باآسانی 2 وکٹوں کے نقصان پر حاصل کرلیا۔
ٹریوس ہیڈ نے 83 گیندوں پر 123 رنز کی شاندار اننگز کھیلی جبکہ جیک ویدرالڈ 23 رنز بناکر آؤٹ ہوئے۔مارنس لبوشین 51 اور کپتان سٹیو اسمتھ 2 رنز بناکر ناٹ آؤٹ رہے۔انگلینڈ کی جانب سے دونوں وکٹیں برائیڈن کارس نے حاصل کیں۔
قبل ازیں اپنی دوسری اننگز میں انگلش ٹیم بہتر آغاز کے باوجود 164 رنز پر ہی ڈھیر ہوگئی تھی۔
پرتھ میں جاری ٹیسٹ میچ میں آسٹریلوی ٹیم کو جیت کے لیے 205 رنز کا ہدف ملا ہے۔
دوسرے روز آسٹریلوی ٹیم نے 123 رنز 9 کھلاڑی آؤٹ پر کھیل کا آغاز کیا تو مجموعی اسکور میں صرف 9 رن کے اضافے کے بعد ہی نیتھن لائن 4 رنز پر برائیڈن کارس کا شکار بن گئے۔
انگلینڈ نے دوسری اننگز کا آغاز کیا تو زیک کرولی کو ایک مرتبہ پھر پہلے ہی اوور میں صفر پر مچل اسٹارک نے چلتا کیا۔
بین ڈکٹ (28) اور اولی پوپ (33) نے دوسری وکٹ پر 65 رنز کی شراکت قائم کرکے ٹیم کو استحکام بخشا تاہم بین ڈکٹ کے آؤٹ ہوتے ہی انگلش بیٹنگ لائن لڑکھڑا گئی۔
104 کے مجموعی اسکور پر انگلینڈ کی 7 وکٹیں گرچکی تھیں۔ جیمی اسمتھ 15، جو روٹ 8، کپتان بین اسٹوکس 2 اور ہیری بروک بغیر کوئی رن بنائے آؤٹ ہوئے۔
آٹھویں وکٹ پر گس ایٹکنسن (37) اور برائیڈن کارس (20) نے 50 رنز کی شراکت قائم کرکے ٹیم کی مشکلات میں کمی کی۔
جوفرا آرچر 5 رنز بناکر آؤٹ ہوئے جبکہ مارک ووڈ 4 رنز پر ناٹ آؤٹ رہے۔
آسٹریلیا کی جانب سے اسکاٹ بولینڈ نے 4 جبکہ مچل اسٹارک اور برینڈن ڈوگٹ نے 3،3 وکٹیں حاصل کیں۔
قبل ازیں ایشز ٹیسٹ کا پہلا روز فاسٹ بولرز کے نام رہا، مجموعی طور 19 وکٹیں گرگئیں جو کسی بھی ایشیز ٹیسٹ کے پہلے روز سب سے زیادہ تعداد ہے۔
آسٹریلوی ٹیم نے پہلے روز ہی انگلینڈ کو 172 رنز پر ڈھیر کرنے کے بعد اننگز کا آغاز کیا تو دوسری ہی گیند پر ڈیبیوٹنٹ جیک ویدرالڈ جوفرا آرچر کا شکار بن گئے۔
28 کے مجموعی اسکور پر مارنس لبوشین 9 رنز بناکر جوفرا آرچر کی گیند پر بولڈ ہوگئے۔
30 کے مجموعی اسکور پر کپتان اسٹیو اسمتھ (17) اور 31 کے مجموعی اسکور پر عثمان خواجہ (2) رنز بناکر برائیڈن کارس کا شکار بنے۔
ٹریوس ہیڈ (21) اور کیمرون گرین (24) نے پانچویں وکٹ کے لیے 45 رنز کی شراکت قائم کی تاہم بالترتیب 76 اور 83 کے مجموعی اسکور پر دونوں بلے بازوں کو انگلش کپتان بین اسٹوکس نے قابو کرلیا۔
مچل سٹارک (12)، ایلکس کیری (26) اور اسکاٹ بولینڈ (صفر) بھی بین اسٹوکس کا شکار بنے۔
واضح رہے کہ بین اسٹوکس کے ٹاس جیت کر پہلے بیٹنگ کے فیصلے نے ماہرین کرکٹ کو بھی حیران کردیا تھا۔
پیٹ کمنز اور جوش ہیزل ووڈ کی غیر موجودگی میں مچل اسٹارک نے کیریئر بیسٹ بولنگ کرتے ہوئے اکیلے ہی انگلش بیٹنگ لائن کو اکھاڑ پھینکا تھا۔
انگلش ٹیم ابتداء سے ہی مشکل میں رہی اور پہلے اوور کی آخری گیند پر ہی پہلی وکٹ گنوادی۔ زیک کرولی بغیر کوئی رن بنائے مچل اسٹارک کا شکار بنے تھے۔
مچل سٹارک نے میچ کے ساتویں اوور میں 33 کے مجموعی اسکور پر بین ڈکٹ (21)کو اور نویں اوور میں 39 رنز پر جو روٹ (صفر) کو چلتا کیا۔ یہ اسٹارک کی انگلینڈ کے خلاف 100ویں وکٹ تھی۔
اولی پوپ اور ہیری بروک نے کچھ مزاحمت دکھائی تاہم لنچ سے قبل ہی 94 کے مجموعی اسکور پر اولی پوپ 46 رنز بناکر کیمرون گرین کا شکار بن گئے۔
انگلینڈ نے کھانے کے وقفے تک 4 وکٹوں کے نقصان پر 105 رنز بنائے تھے۔ کھانے کے وقفے کے بعد کھیل دوبارہ شروع ہوا تو مجموعی اسکور میں صرف 10 رنز کے اضافے کے بعد ہی کپتان بین اسٹوکس 6 رنز بناکر اسٹارک کی گیند پر بولڈ ہوگئے۔
تھوڑی مزاحمت دکھانے والے ہیری بروک بھی 52 رنز بناکر چلتے بنے۔
جیمی سمتھ 33، برائیڈن کارس 6، گس ایٹکنسن ایک اور مارک ووڈ بغیر کوئی رن بنائے آؤٹ ہوئے۔
مچل سٹارک نے 58 رنز کے عوض 7 وکٹیں حاصل کیں جبکہ ڈیبیوٹنٹ برینڈن ڈوگٹ نے 2 اور کیمرون گرین نے ایک وکٹ حاصل کی۔
ایشز: ٹریوس ہیڈ کی جارحانہ سنچری، انگلینڈ کو پہلے ٹیسٹ میں شکست
