اسلام آباد(پاک تر ک نیوز) پاکستان میں الیکٹرک گاڑیوں کے فروغ کی جانب ایک اہم پیش رفت سامنے آئی ہے، چینی کمپنی باہم گلوبل لمیٹڈ اور مقامی کمپنی اسٹار چارج انرجی پاکستان کے درمیان ملک بھر میں الیکٹرک گاڑیوں کے چارجنگ اسٹیشنز قائم کرنے کے لیے مفاہمتی یادداشت پر دستخط کر دیے گئے۔
وزیراعظم کے معاونِ خصوصی برائے صنعت و پیداوار ہارون اختر خان نے تقریب سے خطاب کرتے ہوئے کہا کہ حکومت پاکستان کے ٹرانسپورٹ نظام کو الیکٹرک موبیلٹی کی جانب منتقل کرنے کے لیے پُرعزم ہے۔ ان کا کہنا تھا کہ آئندہ آنے والی بیٹری انرجی اسٹوریج سسٹم پالیسی پاکستان میں الیکٹرک گاڑیوں کے انقلاب کی راہ ہموار کرے گی۔
انہوں نے کہا کہ حکومت ملک میں لیتھیم آئن بیٹریوں کی مقامی تیاری کو فروغ دے رہی ہے، جس سے نہ صرف غیر ملکی سرمایہ کاری آئے گی بلکہ ایک مضبوط اور پائیدار صنعتی نظام بھی تشکیل پائے گا۔
معاہدے کے تحت چینی کمپنی باہم گلوبل لمیٹڈ جدید ٹیکنالوجی اور تکنیکی معاونت فراہم کرے گی، جبکہ اسٹار چارج انرجی پاکستان کے اشتراک سے ملک بھر میں الیکٹرک گاڑیوں کے چارجنگ اسٹیشنز کا نیٹ ورک قائم کیا جائے گا۔
یہ معاہدہ پاکستان کے الیکٹرک وہیکل شعبے کو مضبوط بنانے کی جانب پہلا بڑا بین الاقوامی اشتراک قرار دیا جا رہا ہے، جس کے ذریعے ٹیکنالوجی کی منتقلی، مقامی مینوفیکچرنگ اور جدید انفراسٹرکچر کی ترقی کو فروغ ملے گا۔
یہ بھی پڑھیں: چین کا جدید آبدوز شکن طیارہ Y-9منظر عام پر آ گیا
حکام کے مطابق ملک بھر میں چارجنگ اسٹیشنز کے قیام سے الیکٹرک گاڑیوں کا استعمال آسان ہوگا، صارفین کو بہتر سہولیات میسر آئیں گی اور صاف توانائی پر مبنی ٹرانسپورٹ کو فروغ ملے گا۔
ہارون اختر خان نے کہا کہ الیکٹرک گاڑیوں کی جانب منتقلی سے درآمدی پیٹرولیم مصنوعات پر انحصار کم ہوگا، ملک کا درآمدی بل گھٹے گا، ماحول دوست ٹرانسپورٹ کو فروغ ملے گا اور پاکستان کی توانائی کے شعبے میں خودمختاری مضبوط ہوگی۔
