اسلام آباد (پاک ترک نیوز )وزارتِ اطلاعات و نشریات نے نورستان سے متعلق افغان طالبان حکومت کے الزامات کو بے بنیاد اور من گھڑت قرار دیتے ہوئے مسترد کردیا۔
وزارتِ اطلاعات کے مطابق پاکستان کا نورستان یا افغانستان میں کسی بھی اندرونی جھڑپ سے کوئی تعلق نہیں، جبکہ پاکستانی سیکیورٹی فورسز اور انٹیلی جنس اداروں کے ملوث ہونے کے دعوے بھی بے بنیاد ہیں۔
وزارت نے سابق افغان اہلکاروں کی بھرتی یا تربیت اور داعش سمیت کسی بھی دہشت گرد گروہ کی سہولت کاری کے الزامات بھی مسترد کرتے ہوئے کہا کہ پاکستان کے ملوث ہونے کا کوئی قابلِ تصدیق ثبوت پیش نہیں کیا گیا۔
بیان کے مطابق الزامات کے حق میں شناخت، دستاویزات، مواصلاتی ریکارڈ یا فرانزک شواہد بھی فراہم نہیں کیے گئے، جبکہ سوشل میڈیا پر گردش کرنے والی مبینہ ویڈیو بھی پاکستان سے کسی تعلق کو ثابت نہیں کرتی۔
وزارتِ اطلاعات کا کہنا ہے کہ اقوام متحدہ کی رپورٹس افغانستان میں دہشت گرد تنظیموں کی موجودگی اور سرگرمیوں کی نشاندہی کرتی ہیں، جو پاکستان اور خطے کی سلامتی کے لیے خطرہ ہیں۔
وزارت نے افغان طالبان حکومت پر زور دیا کہ پاکستان پر الزامات لگانے کے بجائے افغان سرزمین پر موجود دہشت گرد تنظیموں کے خلاف قابلِ تصدیق کارروائی کرے اور اپنی سرزمین کسی دوسرے ملک کے خلاف دہشت گردی کے لیے استعمال نہ ہونے دینے کا وعدہ پورا کرے۔
