کوہاٹ ( پاک ترک نیوز) کوہاٹ پرانا پولیس لائنز دھماکے سے متعلق بم ڈسپوزل یونٹ نے تفصیلی رپورٹ تیار کرکے سنٹرل پولیس آفس ارسال کردی۔رپورٹ کے مطابق بم ڈسپوزل یونٹ نے دھماکے کے مرکز کا تعین کیا اور استعمال کیے گئے دھماکا خیز مواد کی نوعیت اور مقدار کا جائزہ لیا۔رپورٹ میں بتایا گیا کہ دھماکے سے بننے والے گڑھے کا ظاہری قطر 6.6 فٹ بائی 11 فٹ جبکہ گہرائی 4.6 فٹ تھی۔بم ڈسپوزل یونٹ کے مطابق دھماکے میں مجموعی طور پر 869 کلوگرام دھماکا خیز مواد استعمال کیا گیا، جبکہ دھماکے میں استعمال ہونے والی گاڑی کی ابتدائی شناخت بھی کرلی گئی ہے۔
یہ بھی پڑھیں: پاکستان میں براہِ راست غیر ملکی سرمایہ کاری میں اضافہ
رپورٹ کے مطابق انتہائی طاقتور دھماکا خیز مواد استعمال کیا گیا۔ دھماکے کے بعد اسپیشل برانچ کی عمارت کے اندر سے غیر پھٹا ہوا دھماکا خیز مواد بھی برآمد ہوا۔رپورٹ میں بتایا گیا کہ گراؤنڈ فلور سے دو بارودی آلات جبکہ پہلی منزل سے ایک خودکش جیکٹ برآمد ہوئی۔ خودکش جیکٹ میں چار بارودی آلات نصب تھے۔بم ڈسپوزل یونٹ کے مطابق کلیئرنس کارروائی مکمل ہونے کے بعد علاقے کو محفوظ اور قابو میں قرار دے دیا گیا۔رپورٹ کے مطابق دھماکے کے بعد حملہ آور پرانا پولیس لائنز کوہاٹ میں داخل ہوئے اور مسلح حملہ کیا، جبکہ حملہ آوروں نے اسپیشل برانچ کے بلاک میں مضبوط مورچہ قائم کیا۔واضح رہے کہ 18 ستمبر کو پرانا پولیس لائنز کوہاٹ میں دھماکا ہوا تھا۔
