کوئٹہ (پاک ترک نیوز )چیئرمین پاکستان پیپلز پارٹی بلاول بھٹو زرداری نے کوئٹہ میں صحت کے دس منصوبوں کا افتتاح کر دیا ،تقریب سے خطاب میں بلاول بھٹو زرداری نے کہا باقی پروجیکٹس کا گلگت بلتستان کے الیکشن کے بعد افتتاح کروں گا، شہریوں کو علاج کی بہترین سہولت فراہم کرنا چاہتے ہیں۔
بلاول بھٹو زرداری نے کہا کہ نہ صرف بلوچستان بلکہ پورے خطے میں مشکلات ہیں، جن کے باعث معاشی مشکلات بھی پیدا ہو رہی ہیں۔ شہریوں کو علاج کی بہترین سہولت فراہم کرنا چاہتے ہیں، اگر آپ کے وسائل نہیں تو اس کا یہ مطلب نہیں ہونا چاہیے کہ آپ کا علاج نہیں ہوسکتا۔
پی پی چیئرمین نے مزید کہا کہ کوشش ہے شہریوں کو ان کے گھر کے دروازے پر علاج کی سہولتیں فراہم کی جائیں۔
واضح رہے کہ پیپلز ایئر ایمبولینس کے ذریعے بلوچستان کے دور دراز علاقوں میں فوری طبی امداد اور مریضوں کی ہنگامی منتقلی ممکن بنائی جائے گی۔ ایمبولینس میں جدید طبی آلات، آکسیجن سسٹم، اور مانیٹرنگ مشینوں کی تنصیب کی گئی ہے جبکہ نوزائیدہ بچوں کی ہنگامی منتقلی کے لیےخصوصی انکیوبیٹر بھی نصب کیا گیا ہے
