اسلام آباد(پاک ترک نیوز ) حکومت اور پیپلز پارٹی کے درمیان مذاکرات کا ایک اور دور ہوا ہے ، جس میں دونوں جانب سے اہم رہنماؤں نے شرکت کی۔
پیپلز پارٹی کے وفد میں سابق وزیراعظم راجہ پرویز اشرف، سینیٹر فاروق ایچ نائیک، شیری رحمان اور مرتضیٰ وہاب شامل ہیں، جبکہ حکومتی وفد کی سربراہی وزیراعظم کے مشیر رانا ثنا اللہ کر رہے ہیں۔ طارق فضل چوہدری بھی مذاکرات میں شریک ہیں۔
ذرائع کا کہنا ہے کہ اسپیکر قومی اسمبلی سردار ایاز صادق مذاکرات میں ثالث کا کردار ادا کر رہے ہیں اور فریقین کے درمیان اختلافات ختم کرنے کے لیے بات چیت آگے بڑھائی جا رہی ہے۔
پیپلز پارٹی نے سندھ کے ترقیاتی منصوبوں کے لیے مطلوبہ فنڈز منظور نہ کیے جانے پر احتجاج کیا ہے، جبکہ قانون سازی کے معاملات میں اعتماد میں نہ لینے پر بھی تحفظات کا اظہار کیا ہے۔
ذرائع کے مطابق حکومت نے کورم کی نشاندہی کے معاملے پر اپوزیشن کا ساتھ دینے پر پیپلز پارٹی سے شکوہ کیا ہے۔
اسپیکر قومی اسمبلی سردار ایاز صادق نے فریقین پر زور دیا ہے کہ باہمی افہام و تفہیم کے ذریعے مسائل حل کیے جائیں تاکہ حکومت اور پیپلز پارٹی کے درمیان تعاون کا سلسلہ متاثر نہ ہو۔
مذاکرات میں سندھ کے ترقیاتی منصوبوں، قانون سازی اور پارلیمانی معاملات سمیت دیگر امور پر تبادلہ خیال کیا جا رہا ہے۔
