اسلام آباد (پاک ترک نیوز )حکومت اور تحریک انصاف کے درمیان مذاکرات کا دوسرا دور تاخیر کا شکار ہوگیا۔
ذرائع کے مطابق مذاکرات کے لیے پہلے 2 بجے اور پھر 3 بجے کا وقت مقرر کیا گیا تھا، تاہم ابھی تک باضابطہ اجلاس شروع نہیں ہوسکا۔
مذاکرات میں مسلم لیگ ن، پیپلز پارٹی اور اپوزیشن کے وفود شرکت کریں گے۔اسپیکر قومی اسمبلی سردار ایاز صادق حکومت اور اپوزیشن کے درمیان مذاکرات کی میزبانی اور صدارت کریں گے۔
مذاکرات میں شرکت کے لیے وفاقی وزیر داخلہ محسن نقوی ،وزیر مملکت طلال چودھری ،بیرسٹر گوہر ،علامہ ناصر عباس،اسد قیصر ،سینیٹر شیری رحمٰن اور وفاقی وزیر امیر مقام پارلیمنٹ ہاؤس پہنچ گئے
دوسری جانب اسپیکر قومی اسمبلی سردار ایاز صادق سے حکومتی مذاکراتی ٹیم نے ملاقات کی۔ ذرائع کے مطابق ملاقات میں حکومت اور اپوزیشن کے درمیان مذاکرات کے دوسرے دور سے متعلق مشاورت کی گئی۔
