مکہ مکرمہ (پاک ترک نیوز ) مکہ مکرمہ میں سعودی عرب، پاکستان اور ترکیہ کے درمیان طے پانے والے مشترکہ دفاعی معاہدے پر ترکیہ کے صدر رجب طیب اردوان نے اہم بیان جاری کیا ہے۔
ترک صدر نے سماجی رابطے کی ویب سائٹ ایکس پر اپنے بیان میں کہا کہ سعودی ولی عہد اور وزیراعظم شہزادہ محمد بن سلمان کی پرخلوص دعوت پر آج مکہ مکرمہ کا دورہ کیا، جہاں سعودی ولی عہد شہزادہ محمد بن سلمان اور پاکستان کے وزیراعظم شہباز شریف سے ملاقات ہوئی۔
انہوں نے کہا کہ اس موقع پر تینوں ممالک کے درمیان مشترکہ دفاعی معاہدے پر دستخط کیے گئے، جو اجتماعی دفاعی صلاحیت، سیکیورٹی اور دفاعی تعاون کو مزید مضبوط بنانے، دفاعی صنعت میں مشترکہ منصوبوں کے فروغ اور دہشت گردی کے خلاف مؤثر تعاون کو فروغ دینے میں اہم کردار ادا کرے گا۔
رجب طیب ایردوان نے کہا کہ یہ معاہدہ اقوام متحدہ کے چارٹر کے آرٹیکل 51 میں بیان کردہ حقِ دفاع کی بھی توثیق کرتا ہے۔
ترک صدر کا کہنا تھا کہ یہ معاہدہ کسی ملک کے خلاف نہیں بلکہ خطے میں امن، خوشحالی اور استحکام کے خواہاں تمام برادر ممالک کی شمولیت کے لیے کھلا ہے۔
انہوں نے مزید کہا کہ ترکیہ بات چیت اور سفارت کاری کے ذریعے تنازعات اور بحرانوں کے حل کے اپنے اصولی مؤقف پر ثابت قدم رہے گا۔
اپنے بیان کے اختتام پر ترک صدر نے دعا کی کہ یہ دورہ، باہمی مشاورت اور آج طے پانے والا معاہدہ پورے خطے کے لیے خیر، برکت، امن اور استحکام کا ذریعہ بنے۔
