مکہ مکرمہ (پاک ترک نیوز )سعودی عرب، پاکستان اور ترکیہ کے درمیان طے پانے والے مکہ دفاعی معاہدے پر سعودی وزیر خارجہ شہزادہ فیصل بن فرحان نے تہنیتی بیان جاری کرتے ہوئے اسے تینوں ممالک کے امن، ترقی اور عوام کی خوشحالی کے لیے ایک اہم سنگِ میل قرار دیا ہے۔
سعودی وزیر خارجہ نے اپنے ایکس اکاؤنٹ پر جاری بیان میں کہا کہ سعودی ولی عہد، ترکیہ کے صدر اور پاکستان کے وزیراعظم کی جانب سے مشترکہ مکہ دفاعی معاہدے پر دستخط تینوں ممالک کے درمیان برادرانہ تعلقات کی توثیق کرتے ہیں۔
انہوں نے کہا کہ دفاعی تعاون کے فروغ کے سلسلے میں یہ معاہدہ ایک اہم پیش رفت ہے، جو خطے کو درپیش مشترکہ خطرات سے نمٹنے کے لیے تینوں ممالک کی مشترکہ کوششوں کی عکاسی کرتا ہے۔
شہزادہ فیصل بن فرحان کا کہنا تھا کہ یہ معاہدہ سلامتی اور استحکام کے تحفظ اور زیادہ محفوظ علاقائی ماحول کے قیام کے لیے سعودی عرب، پاکستان اور ترکیہ کے مشترکہ سیاسی عزم کا مظہر ہے۔
انہوں نے مزید کہا کہ مکہ دفاعی معاہدہ ایک محفوظ مستقبل کی راہ ہموار کرے گا، جو تینوں ممالک میں ترقی، خوشحالی اور اقتصادی مواقع کے فروغ میں معاون ثابت ہوگا۔
