اسلام آباد ( پاک ترک نیوز) نائب وزیراعظم اسحاق ڈار سے ایران کے لیے پاکستان کے نامزد سفیر عمران احمد صدیقی نے ملاقات کی ہے ،نائب وزیرِاعظم نے پاکستان اور ایران کے گہرے تاریخی، ثقافتی اور برادرانہ تعلقات کو اجاگر کیا۔
نائب وزیراعظم نے دوطرفہ تعاون کو تمام شعبوں میں مزید وسعت دینے کے پاکستان کے پختہ عزم کا اعادہ کیا اور کہا پاکستان ایران کے ساتھ تجارت، رابطہ سازی، عوامی روابط اور علاقائی تعاون کے شعبوں میں تعاون کو فروغ دینا چاہتا ہے،دوطرفہ روابط میں مثبت پیش رفت کو قریبی رابطہ کاری اور باہمی افہام و تفہیم کے ذریعے برقرار رکھنا نہایت اہم ہے، نائب وزیرِاعظم نے علاقائی امن، مکالمے اور استحکام میں پاکستان کے تعمیری اور ذمہ دارانہ کردار کو بھی اجاگر کیا۔
اسحاق ڈار نے کہا توقع ہے نامزد سفیر دیرینہ شراکت داری کو مزید مضبوط بنانے میں اہم کردار ادا کریں گے، نائب وزیراعظم نے نئی ذمہ داریاں سنبھالنے پر نامزد سفیر کے لیے نیک خواہشات کا اظہارکیا ہے۔
