مظفر آباد(پاک ترک نیوز ) کالعدم جوائنٹ ایکشن کمیٹی کوایک اور بڑا جھٹکا، مرکزی اراکین فیصل گیلانی اور خواجہ انیس کا لاتعلقی کا اعلان کردیا ۔
بیرونی ایماء پر آزاد جموں و کشمیر میں انتشار پھیلانے والی کالعدم تنظیم کے اپنے اراکین کا لاتعلقی کا سلسلہ جاری ہے۔مرکزی اراکین فیصل گیلانی اور خواجہ انیس کی ویڈیو پیغام میں آزاد جموں و کشمیر کے نوجوانوں سے کالعدم کمیٹی کے انتشار کو مسترد کرنے کی اپیل کی ہے۔
کالعدم ایکشن کمیٹی کے مرکزی کارکن فیصل گیلانی نے بھی لاتعلقی کا اعلان کرتے ہوئے کہا کہ کالعدم جوائنٹ ایکشن کمیٹی عوامی حقوق کے مشن سے پیچھے ہٹ چکی ہے ۔
فیصل گیلانی کا مزید کہنا تھا کہ میں کسی ایسی تحریک کا حصہ نہیں رہ سکتا جو ملک دشمن عناصر کی ایما پر نوجوانوں کو پاکستان کیخلاف استعمال کرے۔کالعدم تنظیم بیرونی شرپسند عناصر کے ایجنڈا پر کاربند ہے۔
یہ بھی پڑھیں: کالعدم عوامی ایکشن کمیٹی کو جھٹکا ،کور ممبرافتخار محمود کا لاتعلقی کا اعلان
نیلم سے تعلق رکھنے والے کالعدم ایکشن کمیٹی کے رکن خواجہ انیس نے ویڈیو پیغام میں کہا کہ عوامی حقوق کے نام پر شروع ہو نے والی تحریک نے ریاست اور اداروں کیخلاف اپنی حدود پار کر دی ہیں۔
خواجہ انیس کا مزید کہنا تھا کہ پاکستان اور ریاستی اداروں کیخلاف کسی بھی قسم کا بیان ناقابلِ برداشت ہے، میں کشمیری نوجوانوں سے اس کالعدم کمیٹی سے دور رہنے کی اپیل کرتا ہوں۔
خواجہ انیس نے اپنے بیان میں کہا کہ میں واضح طور پر ملک دشمن کالعدم جوائنٹ ایکشن کمیٹی سے علیحدگی کا اعلان کرتا ہوں۔
مظفرآباد ڈویژن نے مکمل طور پر کالعدم جوائنٹ عوامی ایکشن کمیٹی سے لاتعلقی اختیار کر لی ہے۔آزاد جموں و کشمیر بھر کے تمام تاجر بھی اس کالعدم تنظیم سے خود کو الگ کر چکے ہیں۔
ماہرین کے مطابق کالعدم کمیٹی کے مرکزی اراکین کی طرف سے دیے جانے والے پیغام سے شرپسند ٹولے کا انتشاری ایجنڈا کھل کر سامنے آگیا ہے۔کالعدم تنظیم کے مرکزی اراکین بھی پاک فوج اور پاکستان کیخلاف بیانیے کو مسترد کرتے ہوئے انتشاری کمیٹی سے خود کو الگ کر رہے ہیں۔
