اسلام آباد ( پاک ترک نیوز) وزیراعظم محمد شہباز شریف کی زیر صدارت نیشنل یوتھ ایمپلائمنٹ پالیسی پر عملدرآمد کے حوالے سے جائزہ اجلاس ہوا، جس میں نوجوانوں کو روزگار کے زیادہ سے زیادہ مواقع فراہم کرنے کے لیے حکومتی اقدامات اور پیش رفت کا جائزہ لیا گیا۔
وزیراعظم شہباز شریف نے ہدایت کی کہ نیشنل یوتھ ایمپلائمنٹ پالیسی کے تحت نوجوانوں کو روزگار کے مواقع فراہم کرنے کے لیے مربوط اور مؤثر اقدامات یقینی بنائے جائیں۔
وزیراعظم نے کہا کہ پالیسی پر عملدرآمد کی پیش رفت کا جائزہ لینے کے لیے ہر ماہ اجلاس منعقد کیا جائے گا۔ ملک کے ہنرمند اور باصلاحیت نوجوانوں کو باعزت روزگار کی فراہمی حکومت کی اولین ترجیحات میں شامل ہے۔
انہوں نے کہا کہ ملک کی پہلی نیشنل یوتھ ایمپلائمنٹ پالیسی کا اجرا حکومت کی مخلصانہ کاوشوں کا عکاس ہے، جبکہ اس پالیسی پر مؤثر عملدرآمد کے لیے مختلف وزارتوں اور اداروں کے درمیان بین الوزارتی تعاون اور جامع حکمت عملی ناگزیر ہے۔
وزیراعظم نے نوجوانوں، بالخصوص خواتین کو روزگار کے نئے مواقع میں شامل کرنے کے لیے انہیں ہنرمند بنانے پر خصوصی توجہ دینے کی ہدایت بھی کی۔
انہوں نے کہا کہ بلوچستان اور خیبر پختونخوا سمیت ملک کے تمام علاقوں کے نوجوانوں کو روزگار کے مواقع فراہم کرنے پر خصوصی توجہ دی جائے۔
اجلاس میں بتایا گیا کہ ملک کی ہنرمند افرادی قوت کو اندرون ملک اور بیرون ملک کاروباری و صنعتی ضروریات سے ہم آہنگ کرنے کے لیے نیوٹیک اور سمیڈا میں اصلاحات کی گئی ہیں۔
بریفنگ میں بتایا گیا کہ نوجوانوں کو بیرون ملک روزگار کے مواقع فراہم کرنے کے لیے بین الاقوامی مارکیٹ کی طلب کے مطابق تربیت دی جا رہی ہے، جبکہ نیشنل ووکیشنل اینڈ ٹیکنیکل ٹریننگ کمیشن بین الاقوامی سرٹیفیکیشن اور مختلف زبانوں میں مہارت کے لیے بھی اقدامات کر رہا ہے۔
یہ بھی پڑھیں: سپریم کورٹ کابانی پی ٹی آئی کو آج ہی شفا انٹرنیشنل اسپتال منتقل کرنے کا حکم
حکومت کی جانب سے ڈیجیٹل یوتھ ہب کے ذریعے نوجوانوں کو ایک ہی پلیٹ فارم پر اندرون اور بیرون ملک روزگار کے مواقع سے متعلق معلومات فراہم کی جا رہی ہیں۔
اجلاس میں مزید بتایا گیا کہ تعلیمی اداروں میں یوتھ ڈویلپمنٹ سیلز قائم کیے جا رہے ہیں، جو نوجوانوں کو کیریئر کاؤنسلنگ، روزگار اور ہنرمندی کے مواقع کے حوالے سے رہنمائی فراہم کریں گے۔وزیراعظم نے پالیسی سے نوجوانوں کو حاصل ہونے والے فوائد سے متعلق ملک گیر آگاہی مہم چلانے کی بھی ہدایت کی۔اجلاس میں چیئرمین وزیراعظم یوتھ پروگرام رانا مشہود نے وزیراعظم کی ہدایات کی روشنی میں کیے گئے اقدامات پر بریفنگ دی۔
اجلاس میں نائب وزیراعظم و وزیر خارجہ اسحاق ڈار، وفاقی وزرا احسن اقبال، احد خان چیمہ، عطاء اللہ تارڑ، مصدق ملک، شزا فاطمہ خواجہ، چیئرمین وزیراعظم یوتھ پروگرام رانا مشہود اور دیگر متعلقہ حکام نے شرکت کی۔
