بشکیک (پاک ترک نیوز) وزیراعظم شہباز شریف نے کہا ہے کہ پانی خطے کی لائف لائن اور آنے والی نسلوں کے مستقبل کی ضمانت ہے، پانی کو سیاسی مقاصد یا ہتھیار کے طور پر استعمال کرنا ناقابل قبول ہے۔شنگھائی تعاون تنظیم کے سربراہی اجلاس سے خطاب کرتے ہوئے وزیراعظم نے کہا کہ عالمی معاہدوں پر عمل درآمد یقینی بنانا ضروری ہے۔وزیراعظم شہباز شریف نے کہا کہ پاکستان پائیدار علاقائی امن کے لیے پرعزم ہے، جبکہ اسلام آباد مفاہمتی یادداشت خطے میں کشیدگی کم کرنے کی جانب ایک اہم قدم ہے۔
وزیراعظم نے واضح کیا کہ مکہ معاہدہ کسی ملک کے خلاف نہیں بلکہ خطے میں امن، استحکام اور تعاون کے فروغ کے لیے ہے۔دہشت گردی کے حوالے سے وزیراعظم نے کہا کہ یہ خطے کو درپیش سنگین ترین خطرات میں سے ایک ہے۔انہوں نے کہا کہ پاکستان نے دہشت گردی کے خلاف جنگ میں 90 ہزار سے زائد جانوں کی قربانیاں دی ہیں۔
یہ بھی پڑھیں: بشکیک میں شنگھائی تعاون تنظیم کا سربراہانِ مملکت اجلاس، وزیراعظم شہباز شریف کی شرکت
وزیراعظم شہباز شریف نے کہا کہ پاکستان پرامن، مستحکم اور خوشحال افغانستان کا خواہاں ہے، تاہم افغان سرزمین کو پاکستان کے خلاف دہشت گردی کے لیے استعمال نہیں ہونے دیا جاسکتا۔انہوں نے اس عزم کا اعادہ کیا کہ پاکستان خطے میں امن، استحکام اور خوشحالی کے لیے اپنا کردار ادا کرتا رہے گا۔
