اسلام آباد ( پاک ترک نیوز) وزیراعظم اور قائد حزب اختلاف کے درمیان ملاقات کے مقام پر اتفاق نہ ہو سکا، وفاقی حکومت نے وزیراعظم ہاؤس اور پارلیمنٹ کے علاوہ کسی تیسرے مقام پر ملاقات سے معذرت کر لی۔ذرائع کے مطابق قائد حزب اختلاف نے حکومت کو کسی تیسرے مقام پر ملاقات کا پیغام بھجوایا تھا، جس پر وفاقی حکومت نے وزیراعظم ہاؤس نہ آنے کی صورت میں دستور کمیٹی روم میں ملاقات کی پیشکش کی۔
یہ بھی پڑھیں: تھائی لینڈ جانے والے 2 پاکستانی مسافر کراچی ایئرپورٹ پر آف لوڈ
وزیراعظم کے مشیر رانا ثنا اللہ نے کہا ہے کہ وزیراعظم قائد حزب اختلاف سے ملاقات وزیراعظم ہاؤس میں ہی کرنا چاہتے ہیں۔ وزیراعظم ہاؤس حکومت کی ذاتی ملکیت نہیں بلکہ ریاستی رہائش گاہ ہے۔رانا ثنا اللہ کا کہنا تھا کہ اس قسم کی بے معنی باتیں پہلے بھی کی جاتی رہی ہیں، قائد حزب اختلاف نے ضد اپنا رکھی ہے جو قابل قبول نہیں۔ملاقات کے مقام پر اختلاف کے باعث دونوں رہنماؤں کے درمیان ملاقات کے معاملے پر پیش رفت غیر یقینی ہو گئی ہے۔
