تہران ( پاک ترک نیوز ) وزیر داخلہ محسن نقوی نے ایرانی وزیر خارجہ عباس عراقچی سے ملاقات کی ہے جس میں پاکستان کی سیاسی اور عسکری قیادت کے خصوصی پیغامات ایرانی سپریم لیڈر تک پہنچائے گئے
ایرانی سرکاری میڈیا کے مطابق ملاقات میں پاکستان اور ایران کے درمیان دوطرفہ تعلقات، علاقائی سلامتی، سرحدی تعاون اور مشرق وسطیٰ کی موجودہ صورتحال پر تفصیلی تبادلہ خیال کیا گیا۔
محسن نقوی نے وزیر اعظم شہبازشریف کا خصوصی پیغام ایرانی سپریم لیڈر آیت اللہ مجتبیٰ خامنہ ای کے لیے عباس عراقچی کے حوالے کیا،محسن نقوی فیلڈ مارشل کا خصوصی خط بھی ساتھ لائے
محسن نقوی نے اپنے ایرانی ہم منصب اسکنر مومنی کے ساتھ ملاقات کے بعد محسن نقوی نے بتایا تھا کہ وہ پاکستان کے فیلڈ مارشل سید عاصم منیر کا خصوصی خط بھی ایرانی سپریم لیڈر کے لیے لے کر آئے ہیں۔
محسن نقوی کا کہنا تھا کہ خط اور پیغام کا مقصد خطے میں امن، استحکام اور جاری سفارتی کوششوں کو آگے بڑھانا ہے۔
وزیر داخلہ نے اس امید کا اظہار کیا کہ پاکستان کی سفارتی کاوشیں خطے میں کشیدگی کم کرنے اور مذاکرات کے ذریعے مسائل کے حل میں مددگار ثابت ہوں گی۔
عباس عراقچی اور محسن نقوی کے درمیان ملاقات میں ایران اور امریکہ کے درمیان جاری سفارتی عمل اور خطے کی مجموعی صورتحال پر بھی تبادلہ خیال کیا گیا۔ دونوں رہنماؤں نے موجودہ بحران کے سیاسی حل اور سفارت کاری کے فروغ کی ضرورت پر زور دیا۔
یہ پہلا موقع نہیں کہ محسن نقوی پاکستان اور ایران کے درمیان رابطہ کاری میں اہم کردار ادا کر رہے ہوں۔ حالیہ مہینوں کے دوران انہوں نے متعدد مرتبہ ایرانی حکام سے ملاقاتیں کیں۔
تہران روانگی سے قبل انہوں نے وزیر اعظم شہباز شریف سے ملاقات کی اور جاری سفارتی کوششوں کے حوالے سے ہدایات حاصل کیں۔
اس سے قبل بھی محسن نقوی نے ایران اور امریکہ کے درمیان جاری بالواسطہ رابطوں اور کشیدگی میں کمی کے لیے سفارتی سطح پر سرگرم کردار ادا کیا۔ ایرانی میڈیا کے مطابق وہ گزشتہ دنوں دو مرتبہ ایرانی وزیر داخلہ اسکندر مومنی سے بین الاقوامی کانفرنسوں کے موقع پر ملاقات کر چکے ہیں، جہاں سرحدی سلامتی، انسداد دہشت گردی، منشیات کی روک تھام اور اقتصادی تعاون کے امور زیر بحث آئے تھے۔
تجزیہ کاروں کے مطابق محسن نقوی کا حالیہ دورہ اس بات کا مظہر ہے کہ پاکستان خطے میں کشیدگی کم کرنے اور ایران و امریکہ کے درمیان سفارتی رابطوں کو برقرار رکھنے کے لیے فعال کردار ادا کر رہا ہے۔
وزیر اعظم شہباز شریف اور فیلڈ مارشل عاصم منیر کے مشترکہ پیغامات کی تہران روانگی کو دونوں ممالک کے درمیان اعتماد اور قریبی تعلقات کی علامت قرار دیا جا رہا ہے۔
اس دورے کو پاکستان اور ایران کے درمیان اعلیٰ سطحی سفارتی رابطوں کی ایک اہم کڑی سمجھا جا رہا ہے، جو مستقبل میں سیاسی، اقتصادی اور سکیورٹی تعاون کے مزید مواقع پیدا کر سکتا ہے۔
