اسلام آباد (پاک ترک نیوز ) پیپلز پارٹی کے چیئرمین بلاول بھٹو زرداری اور وفاقی وزراء کے درمیان ملاقات ہوئی ہے جس میں آزاد کشمیر کی مجموعی سیاسی صورتحال، انتخابی ماحول اور امن و امان کی صورتحال پر تفصیلی تبادلہ خیال کیا گیا۔
ذرائع کے مطابق ملاقات میں وفاقی وزراء رانا ثنا اللہ اور امیر مقام بھی موجود تھے، جبکہ پیپلز پارٹی نے آزاد کشمیر کے انتخابی عمل سے متعلق اپنے تحفظات وفاقی وزراء کے سامنے رکھے۔
ذرائع کا کہنا ہے کہ وفاقی وزراء نے تمام مسائل باہمی مشاورت سے حل کرنے کی یقین دہانی کرائی، جبکہ دوسرے مرحلے کے عام انتخابات کے لیے سیکیورٹی مزید سخت بنانے پر اتفاق کیا گیا۔ حساس علاقوں میں اضافی سیکیورٹی انتظامات بھی کیے جائیں گے۔
ذرائع کے مطابق انتخابی مہم کے دوران کسی بھی سیاسی رہنما یا کارکن کی جانب سے اسلحے کی نمائش پر پابندی عائد کرنے کا بھی فیصلہ کیا گیا ہے۔
ملاقات میں پاکستان پیپلز پارٹی اور مسلم لیگ (ن) کے درمیان اس بات پر بھی اتفاق ہوا کہ انتخابات کے دوسرے اور تیسرے مرحلے میں فول پروف سیکیورٹی یقینی بنانے کے لیے مشترکہ حکمت عملی اپنائی جائے گی۔ پہلے مرحلے میں سامنے آنے والی بدانتظامیوں کے پیش نظر مزید سخت انتظامات کیے جائیں گے۔
ذرائع کے مطابق انتخابی ضابطہ اخلاق پر مؤثر عملدرآمد، پرامن انتخابی ماحول برقرار رکھنے اور سیاسی کشیدگی کم کرنے پر بھی زور دیا گیا۔ دونوں جماعتوں نے سیاسی مذاکرات کا سلسلہ جاری رکھنے، رابطوں میں تسلسل برقرار رکھنے اور باہمی تعاون بڑھانے کے عزم کا اظہار کیا۔
ذرائع کے مطابق پیپلز پارٹی اور مسلم لیگ (ن) کے درمیان معاملات کو بہتر بنانے کے لیے مشترکہ سیاسی کمیٹی کے قیام پر بھی غور کیا گیا، جس پر جلد پیش رفت کا امکان ہے۔
ملاقات میں آزاد کشمیر میں شفاف، پرامن اور منصفانہ انتخابات کے انعقاد کو دونوں جماعتوں کی مشترکہ ترجیح قرار دیا گیا۔
