لاہور( پاک ترک نیوز) بات ہو کرکٹ اور میچ ہو پاکستان بھارت کا شائقین کا جوش دیدنی ہو جاتا ہے ۔
ٹی ٹونٹی ورلڈ کپ کا میلہ اپنی پوری آب و تاب کے ساتھ جاری ہے ۔ میگا ایونٹ کے انتہائی اہم میچ میں روایتی حریف پاکستان اور بھارت کی ٹیمیں بڑے معرکے میں 15فروری کو مد مقابل آئیں گے ۔ روایتی حریفوں کے درمیان جوڑ سری لنکا کے شہر کولمبو میں پڑے گا ۔شائقین کرکٹ اس بڑے میچ کا بے صبری سے انتظار کر رہے ہیں ۔
روایتی حریف پاکستان اور بھارت اب تک ٹی ٹونٹی میچز میں 16مرتبہ ایک دوسرے کے مد مقابل آ چکے ہیں جہاں بھارت کا پلڑا بھاری ہے ۔ انڈیا نے 13جبکہ پاکستان نے 3میچز میں کامیابی سمیٹی ہے ۔
پاکستان نے بھارت کو آخری بار ٹی ٹونٹی میچ میں 2022میں شکست دی تھی ۔ اس وقت ٹیم کی قیادت بابر اعظم کے ہاتھ میں تھی ۔یہ میچ دبئی میں کھیلا گیا تھا ۔اس کے بعد انڈیا نے مسلسل پانچ میچوں میں کامیابی سمیٹی ہے ۔
پاک بھارت میچوں میں زیادہ رنز کی بات کی جائے تو ویرات کوہلی 492رنز کے ساتھ پہلے ،محمد رضوان 228کے ساتھ دوسرے جبکہ شعیب ملک 164رنز کے ساتھ تیسری پوزیشن پر موجود ہیں۔
روایتی حریفوں پاکستان اور بھارت کے درمیان اگر زیادہ وکٹوں کی بات کی جائے تو ہردیک پانڈیا اس فہرست میں پہلی پوزیشن میں موجود ہیں انہوں نے 15وکٹیں اپنے نام کی ہیں ۔ دوسری پوزیشن پر بونیشور کمار 11تیسری پوزیشن پر عمر گل 11وکٹوں کے ساتھ موجود ہیں ۔
