لاہور( پاک ترک نیوز) پاکستان نے ہاکی ورلڈ کپ 2026 میں جنوبی افریقہ کو سنسنی خیز مقابلے کے بعد پینلٹی شوٹ آؤٹ میں 4-3 سے شکست دے کر ایونٹ میں 11ویں پوزیشن حاصل کرلی۔چار مرتبہ کے عالمی چیمپئن پاکستان نے 20 سال بعد ورلڈ کپ میں اپنی بہترین پوزیشن حاصل کی ہے۔ اس سے قبل پاکستان نے 2010 اور 2018 کے ورلڈ کپ میں 12ویں پوزیشن حاصل کی تھی۔
جنوبی افریقہ نے میچ کا جارحانہ آغاز کرتے ہوئے آٹھویں منٹ میں ٹریور ڈی لورا کے گول کی بدولت برتری حاصل کی، جبکہ دوسرے کوارٹر کے آغاز میں ڈایان کیسیئم نے دوسرا گول کرکے جنوبی افریقہ کی برتری 2-0 کردی۔
پاکستان نے شاندار کم بیک کرتے ہوئے افراز اور محمد عماد کے گولز سے اسکور برابر کردیا۔ تیسرے کوارٹر میں رانا وحید اشرف نے گول کرکے پاکستان کو 3-2 کی برتری دلادی۔جنوبی افریقہ کے مصطفٰی کیسیئم نے گول کرکے اسکور دوبارہ برابر کردیا، جبکہ آخری کوارٹر میں 55ویں منٹ پر پینلٹی کارنر کے ذریعے جنوبی افریقہ نے ایک بار پھر برتری حاصل کرلی۔پاکستان نے آخری لمحات میں شاندار جوابی حملہ کرتے ہوئے میچ کے آخری منٹ میں محمد حمدالدین کے گول کی بدولت مقابلہ 4-4 سے برابر کردیا، جس کے بعد فیصلہ پینلٹی شوٹ آؤٹ پر ہوا۔
یہ بھی پڑھیں: پی آئی اے ہولڈنگ کا نصف سالہ خسارہ 76 فیصد بڑھ کر 25 ارب روپے سے تجاوز کر گیا
پینلٹی شوٹ آؤٹ میں دونوں ٹیموں کے درمیان سخت مقابلہ ہوا۔ پاکستان کی جانب سے زکریا حیات، عمر مصطفیٰ اور حنان شاہد نے گول کیے، جبکہ جنوبی افریقہ کی جانب سے دو کوششیں ضائع ہوئیں۔فیصلہ کن پینلٹی پر سابق کپتان عماد بٹ نے ذمہ داری سنبھالی اور گیند جال میں پہنچا کر پاکستان کو فتح دلا دی۔یوں پاکستان نے ہاکی ورلڈ کپ 2026 کی مہم 11ویں پوزیشن کے ساتھ کامیابی سے مکمل کرلی۔
