اسلام آباد ( پاک ترک نیوز) بلوچستان میں دہشت گردوں کے خلاف کامیاب کارروائی پر وزیراعظم شہباز شریف نے سیکیورٹی فورسز کو خراجِ تحسین پیش کیا ہے۔وزیراعظم نے بھارتی سرپرستی میں سرگرم 11 دہشت گردوں کو ہلاک کرنے پر سیکیورٹی فورسز کی بروقت اور مؤثر کارروائی کو سراہا۔شہباز شریف نے خاران میں سڑک بلاک کرکے آمدورفت متاثر کرنے کی دہشت گردوں کی کوشش ناکام بنانے پر بھی فورسز کو خراجِ تحسین پیش کیا۔وزیراعظم نے واشک میں دہشت گردوں کے ٹھکانے کو تباہ کرنے اور وہاں سے 2.9 ٹن دھماکہ خیز مواد برآمد کرنے پر سیکیورٹی فورسز کی پیشہ ورانہ صلاحیتوں کی تعریف کی۔
یہ بھی پڑھیں: وزیراعظم اپنا گھر اسکیم، 8 ہزار 739 افراد کو 45 ارب 43 کروڑ روپے کے قرضے جاری
شہباز شریف نے کہا کہ دہشت گرد اور ان کے سہولت کاروں کے مذموم عزائم کبھی کامیاب نہیں ہوں گے، جبکہ بھارتی سرپرستی میں ہونے والی دہشت گردی کا مکمل خاتمہ کیا جائے گا۔وزیراعظم نے واضح کیا کہ فتنہ الخوارج اور دیگر دہشت گرد عناصر کے خلاف کارروائیاں پوری قوت سے جاری رہیں گی۔
