اسلام آباد ( پاک ترک نیوز) اسلام آباد میں وزیراعظم شہباز شریف کی زیر صدارت ایکسیس ٹو فنانس پلان 2026-2028 کے حوالے سے جائزہ اجلاس ہوا، جس میں ہاؤسنگ، زراعت اور ایس ایم ایز کے لیے فنانسنگ کی پیشرفت کا جائزہ لیا گیا۔
اجلاس کو بتایا گیا کہ وزیراعظم اپنا گھر اسکیم کے تحت اب تک ایک لاکھ 47 ہزار 504 درخواستیں موصول ہوچکی ہیں، جن میں سے 53 ہزار 127 درخواستیں منظور کی جاچکی ہیں۔منظور شدہ درخواستوں کی مجموعی مالیت 313 ارب 42 کروڑ روپے ہے، جبکہ 8 ہزار 739 درخواست گزاروں کو 45 ارب 43 کروڑ روپے کے قرضے جاری کیے جاچکے ہیں۔
وزیراعظم شہباز شریف نے کہا کہ کم آمدن اور متوسط طبقے کے لیے سستی رہائش کی فراہمی حکومت کی ترجیح ہے۔ انہوں نے صوبائی چیف سیکریٹریز کو ایسی املاک کا جامع سروے کرانے کی ہدایت کی جہاں بینک اپنا گھر بنانے کے خواہشمند افراد کو قرض فراہم کرسکیں۔بریفنگ میں بتایا گیا کہ مورگیج کی شرائط پوری کرنے والے پلاٹس کی نشاندہی کے لیے نظام تیار کیا جارہا ہے، جس کا پائلٹ منصوبہ اسلام آباد سے شروع ہوگا۔
یہ بھی پڑھیں: اگست میں پاکستانیوں نے 3 ارب 70 کروڑ ڈالر وطن بھیج دیے، ترسیلات زر میں 16.5 فیصد اضافہ
اجلاس کو بتایا گیا کہ اگست میں زرعی شعبے کے لیے بینکوں کے قرضوں کا حجم ایک اعشاریہ 268 ٹریلین روپے رہا، جبکہ ایس ایم ایز کو قرضوں کا حجم ایک اعشاریہ 067 ٹریلین روپے ریکارڈ کیا گیا۔وزیراعظم نے بینکوں اور مالیاتی اداروں پر زور دیا کہ کسانوں، چھوٹے کاروبار اور ہاؤسنگ سیکٹر کو آسان شرائط پر قرضوں کی فراہمی یقینی بنائی جائے۔
