اسلام آباد:(پاک ترک نیوز)فیڈرل بورڈ آف ریونیو (ایف بی آر) نے استعمال شدہ درآمدی موبائل فونز پر عائد پی ٹی اے/کسٹمز ٹیکس میں نمایاں کمی کا اعلان کر دیا ہے، جس کے بعد آئی فون، سام سنگ، گوگل پکسل اور ون پلس سمیت متعدد معروف برانڈز کے فون نسبتاً سستے ہونے کا امکان ہے۔
ڈائریکٹوریٹ جنرل آف کسٹمز ویلیوایشن کراچی نے پیر کے روز ویلیوایشن رولنگ نمبر 2035 آف 2026 جاری کی، جس کے تحت 62 اقسام کے پرانے اور استعمال شدہ برانڈڈ موبائل فونز کے نئے کسٹمز ویلیوز مقرر کیے گئے ہیں۔
ان اقدار کا اطلاق بغیر پیکنگ اور بغیر لوازمات کے کمرشل امپورٹ پر ہوگا۔حکام کے مطابق پرانی ویلیوایشن ڈیڑھ سال سے زائد پرانی ہو چکی تھی، جو عالمی مارکیٹ قیمتوں کی درست عکاسی نہیں کر رہی تھی۔
اس دوران کئی نئے ماڈلز مارکیٹ میں آ چکے تھے جبکہ متعدد پرانے فونز اپنی عمر پوری کر چکے تھے، جس کے باعث ان کی قیمتوں میں کمی ضروری ہو گئی تھی۔
اسی پس منظر میں کسٹمز حکام نے کسٹمز ایکٹ 1969 کی دفعات 25 اور 25A کے تحت نئی ویلیوایشن کا عمل شروع کیا۔
حکام کا کہنا ہے کہ درآمدی دستاویزات میں ظاہر کی جانے والی قیمتوں اور عالمی مارکیٹ ریٹس میں واضح فرق سامنے آ رہا تھا۔نئے فیصلے کے تحت کسٹمز ڈیوٹی اور ٹیکسز فون کی ظاہری حالت یا گریڈ سے قطع نظر، کسٹمز کی مقرر کردہ قیمت پر وصول کیے جائیں گے۔
تاہم شرط یہ ہے کہ استعمال شدہ موبائل فون کم از کم چھ ماہ پہلے ایکٹیویٹ ہو چکا ہو۔ درآمد کنندگان کو ایکٹیویشن مدت ظاہر کرنا ہوگی، جس کی تصدیق متعلقہ افسران کریں گے۔
جن برانڈز یا ماڈلز کو فہرست میں شامل نہیں کیا گیا، ان کی ویلیوایشن کسٹمز ایکٹ کی دفعات 25(5) اور 25(6) کے تحت کی جائے گی۔کسٹمز حکام کے مطابق ویلیوایشن کے عمل کے دوران درآمد کنندگان اور دیگر اسٹیک ہولڈرز سے متعدد اجلاس کیے گئے، 90 دن کا درآمدی ڈیٹا جانچا گیا، مارکیٹ سروے اور مقامی بازاروں کے دورے بھی کیے گئے۔
چونکہ امپورٹ ڈیٹا میں تضاد پایا گیا، اس لیے حتمی قیمتیں مارکیٹ انکوائری کی بنیاد پر طے کی گئیں۔حکام کا کہنا ہے کہ نئی ویلیوایشن سے انڈر انوائسنگ کی حوصلہ شکنی، ریونیو میں بہتری اور استعمال شدہ موبائل فونز کی درآمد میں شفافیت آئے گی، جبکہ صارفین کو بھی بالواسطہ ریلیف ملنے کی توقع ہے۔
