از: سہیل شہریار
دنیا کےگیارہ ملکوں میں 22ہزار کے قریب پاکستانی شہری جیلوں میں قید ہیں۔ جن میں سے 13ہزارکے خلاف مقدمات زیر سماعت ہیں ۔جبکہ ساڑھے 8ہزار سے زائد سزائیں بھگت رہے ہیں۔
یہ انکشاف وزارت خارجہ کی جانب سے قومی اسمبلی میںدئیے گئے جواب میں کیا گیا ہے۔نائب وزیر اعظم اور وزیر خارجہ اسحاق ڈارنے بتایا ہے کہ 21 ہزار 647 پاکستانی شہری دنیا بھرکے گیارہ ملکوں کی جیلوں میں قید ہیں۔
اس وقت سب سے زیادہ10 ہزار 745 پاکستانی شہری سعودی عرب میں مختلف جرائم میں قید ہیں۔جن میں سے کچھ پاکستانی شہری سزا یافتہ ہیں اور بیشتر کے مقدمات زیر سماعت ہیں۔اس کے بعد متحدہ عرب امارات میں 5 ہزار 297 پاکستانی شہری قید ہیں۔ تاہم ان میں سے بیشتر کے جرائم کے حوالے سے تفصیلات دستیاب نہیں۔ بھارت میں 738 پاکستانی شہری قید ہیں۔مگر بھارتی حکام کی جانب سے قید پاکستانی شہریوں کے حوالے سے کوئی معلومات نہیں دی جا رہیں کہ انھیں کس جرم میں قید کیا گیا ہے۔
چین میں اس وقت 652 پاکستانی شہری قید ہیں۔جن میں زیادہ تر منشیات کی اسمگلنگ، جعلی کرنسی کے استعمال، فراڈ یا غیر قانونی امیگریشن جیسے جرائم میں ملوث ہیں۔قطر میں 599، عمان میں 578، ملائیشیا میں 444، اٹلی میں 353، بحرین میں 218 اور ترکیہ میں 190 پاکستانی شہری قید ہیں۔
اسکے علاوہ مریکا میں اس وقت 141 پاکستانی شہری مختلف مقدمات میں قید ہیں۔ جبکہ افغانستان میں 91 پاکستانی شہری قید ہیں۔
مجموعی طور پر بیرون ملک قید 13 ہزار 78 پاکستانیوں کے مقدمات زیر سماعت ہیں۔ جبکہ 8 ہزار 569 پاکستانی شہری مختلف مقدمات میں سزائیں کاٹ رہے ہیں۔
