لاہور(پاک ترک نیوز) اسپیکر پنجاب اسمبلی ملک محمد احمد خان نے کہا ہے کہ پاکستان کی ترقی کی راہ میں حائل مسائل کا حل تعلیم میں پوشیدہ ہے، جب تک تعلیم کو فروغ نہیں دیا جائے گا ملک ترقی نہیں کر سکتا۔ ہمیں تعلیم کے بجٹ میں اضافہ اور دستیاب وسائل کا زیادہ سے زیادہ حصہ تعلیم پر خرچ کرنا ہوگا۔
پنجاب یونیورسٹی میں ایک تقریب سے خطاب کرتے ہوئے اسپیکر پنجاب اسمبلی نے کہا کہ وہ روزانہ ایک طالب علم کی حیثیت سے سیکھنے اور اپنی غلطیوں سے سبق حاصل کرنے کی کوشش کرتے ہیں۔ ان کا کہنا تھا کہ ان سے پہلے بھی کئی شخصیات اس عہدے پر فائز رہ چکی ہیں، یہ عہدہ ایک امانت ہے۔
ملک محمد احمد خان نے اپنے تعلیمی دور کا ذکر کرتے ہوئے کہا کہ وہ کوئی بہت اچھے طالب علم نہیں تھے اور آخری دنوں میں محنت کرکے امتحان پاس کر لیا کرتے تھے۔ تاریخ سے ان کا ابتدا میں زیادہ گہرا تعلق نہیں تھا، تاہم تاریخ نے انہیں سکھایا کہ حکومتیں کیسے بنتی اور کیسے ٹوٹتی ہیں۔
انہوں نے کہا کہ تقریب میں آؤٹ آف اسکول بچوں اور تعلیم میں صنفی تفریق کے بڑھتے ہوئے مسئلے پر بھی بات ہوئی۔ گزشتہ روز وہ ٹوبہ ٹیک سنگھ کے ایک گاؤں میں گئے، جہاں اسکول کے بچے نمایاں پوزیشنیں حاصل کر رہے ہیں۔
یہ بھی پڑھیں: راولپنڈی ٹیسٹ: شاہینوں کی تباہ کن بولنگ، سری لنکن ٹیم 98 رنز پر ڈھیر
اسپیکر پنجاب اسمبلی نے سوال اٹھایا کہ پاکستان کا اصل مسئلہ کیا ہے اور ہم ترقی کیوں نہیں کر پا رہے؟ جنگوں کے بعد کئی ممالک دوبارہ اپنے پاؤں پر کھڑے ہو گئے، لیکن پاکستان میں آج بھی شرح خواندگی 60 فیصد سے زیادہ نہیں جبکہ غربت بھی ایک بڑا مسئلہ ہے۔
انہوں نے زور دیا کہ تعلیم کے علاوہ ترقی کا کوئی دوسرا راستہ نہیں، ملک کے پاس جو بھی وسائل ہیں، ان کا زیادہ سے زیادہ حصہ تعلیم پر خرچ کیا جانا چاہیے۔












