لاہور(پاک ترک نیوز ) وزیراعلیٰ پنجاب مریم نواز شریف کی جانب سے بھیجے گئے 5 ارب روپے ہرجانے کے قانونی نوٹس پر وفاقی وزیر چوہدری سالک حسین نے تحریری جواب ارسال کر دیا۔
ذرائع کے مطابق چوہدری سالک حسین کی جانب سے قانونی نوٹس کا جواب ایڈیشنل ایڈووکیٹ جنرل محمد نواز کے ذریعے بھجوایا گیا ہے۔ مسلم لیگ (ق) کے ذرائع کا کہنا ہے کہ قانونی نوٹس بھی محمد نواز ہی کے ذریعے موصول ہوا تھا، اسی لیے اس کا جواب بھی انہیں کے توسط سے ارسال کیا گیا۔
ذرائع کے مطابق قانونی نوٹس کے جواب کی نقل تاحال ذرائع ابلاغ کو جاری نہیں کی گئی، جبکہ چوہدری سالک حسین نے اپنے تحریری جواب میں کیا مؤقف اختیار کیا ہے، اس کی تفصیلات بھی سامنے نہیں آسکیں۔
یہ بھی پڑھیں: مجھے برین ہیمرج اور دل کے دورے کا خطرہ ہے، زندہ رہوں گا تو بے گناہی ثابت کروں گا: بانی پی ٹی آئی کا چیف جسٹس صاحبان کو خط
واضح رہے کہ وزیراعلیٰ پنجاب مریم نواز شریف نے صوبے میں مبینہ کرپشن سے متعلق بیان پر وفاقی وزیر چوہدری سالک حسین کو 5 ارب روپے ہرجانے کا قانونی نوٹس بھجوایا تھا۔
چوہدری سالک حسین نے اپنے بیان پر قائم رہنے کا اعلان کیا تھا اور گزشتہ دنوں قانونی نوٹس کا تفصیلی جواب تیار کرنے کا دعویٰ بھی کیا تھا۔











