لاہور( پاک ترک نیوز) کیا آپ تصور کر سکتے ہیں کہ خلا سے ایک بہت بڑا پتھر تیزی سے زمین کی طرف بڑھ رہا ہو۔۔۔ اور اس کی ٹکر سے پوری انسانیت خطرے میں پڑ جائے؟ لیکن اگر انسان اسی خلائی چٹان کا راستہ بدل دے تو؟ جی ہاں! سائنس دان اب اسی ناممکن دکھائی دینے والے خواب کو حقیقت بنانے کی کوشش کر رہے ہیں!ناسا نے چار سال پہلے ایک ایسا تجربہ کیا جس نے خلائی تحقیق کی دنیا میں تہلکہ مچا دیا۔ ایک خلائی جہاز کو جان بوجھ کر سیارچے سے ٹکرا دیا گیا، مقصد تباہی پھیلانا نہیں بلکہ مستقبل میں زمین کو ممکنہ تباہی سے بچانے کا طریقہ تلاش کرنا تھا۔اس مشن کا نام تھا ڈارٹ۔۔۔ جس نے 2022 میں ڈائمورفوس نامی سیارچے سے ٹکر مار کر اس کا راستہ تبدیل کرنے کی کامیاب کوشش کی۔ اس ٹکراؤ کے نتیجے میں ڈائمورفوس کا اپنے بڑے ساتھی ڈائیڈیموس کے گرد چکر لگانے کا دورانیہ کم ہوگیا، جبکہ سورج کے گرد اس کے راستے میں بھی معمولی تبدیلی آئی۔
یہ بھی پڑھیں: 500بااثرمسلمانوں کی فہرست ،وزیراعظم،فیلڈ مارشل کا پہلا نمبر
لیکن اصل کہانی اب شروع ہوئی ہے۔۔یورپی خلائی ادارے نے اپنا جدید خلائی جہاز ہیرا اس مقام پر پہنچا دیا ہے، جہاں ناسا کا خلائی جہاز ٹکرایا تھا۔ ہیرا اب ڈائیڈیموس اور ڈائمورفوس کا انتہائی قریب سے معائنہ کر رہا ہے۔ یہ خلائی جہاز دونوں سیارچوں سے صرف 25 سے 30 کلومیٹر کے فاصلے پر پرواز کر رہا ہے۔اور اگلے ماہ یہ مزید قریب پہنچے گا، صرف 20 کلومیٹر کے فاصلے سے سیارچے کا جائزہ لے گا۔ہیرا کسی عام خلائی جہاز کا نام نہیں، بلکہ اسے خلا میں بھیجا گیا ایک روبوٹک جاسوس بھی کہا جا سکتا ہے۔ اس میں 25 جدید سائنسی آلات نصب ہیں، جبکہ دو چھوٹے کیوب سیٹس بھی اس مشن کا حصہ ہیں، جو سیارچے کی سطح کا مزید تفصیلی جائزہ لیں گے اور اس پر اترنے کی کوشش بھی کریں گے۔دلچسپ بات یہ ہے کہ ناسا کے خلائی جہاز کی ٹکر سے سیارچے کی سطح سے بڑے بڑے پتھر اور ملبہ ہزاروں کلومیٹر دور خلا میں بکھر گیا تھا۔ سائنس دانوں کا خیال ہے کہ اس ملبے کے کچھ حصے اب بھی وہاں موجود ہوسکتے ہیں۔، ڈائمورفوس کا قطر تقریباً 151 میٹر، جبکہ اس کے بڑے ساتھی ڈائیڈیموس کا قطر 780 میٹر ہے۔
یہ صرف دو سیارچوں کا معائنہ نہیں، بلکہ زمین کے مستقبل کی حفاظت کی جنگ ہے! سائنس دان یہ جاننے کی کوشش کر رہے ہیں کہ اگر کل کوئی خطرناک خلائی چٹان زمین کی طرف بڑھی تو کیا انسان اس کا راستہ بدل کر کروڑوں نہیں بلکہ اربوں زندگیوں کو بچا سکے گا؟
