اسلام آباد( پاک ترک نیوز )سہیل آفریدی، بابر سلیم سواتی سمیت 9 ارکان اسمبلی کی گرفتاری اور حراست کو وفاقی آئینی عدالت میں چیلنج کردیا گیا۔ محمود خان اچکزئی اور راجہ ناصر عباس کی جانب سے ایڈووکیٹ معظم بٹ کے ذریعے آئینی درخواست دائر کی گئی ہے۔درخواست میں مؤقف اختیار کیا گیا ہے کہ منتخب نمائندوں کو حراست میں رکھنا عوام کے انتخابی مینڈیٹ کو غیر مؤثر بنانے کے مترادف ہے۔ سیاسی وابستگی کی بنیاد پر منتخب نمائندوں کو نشانہ بنانا آئین کے آرٹیکلز 4، 14، 17 اور 25 کی خلاف ورزی ہے۔
درخواست میں اہم آئینی سوال اٹھایا گیا ہے کہ کیا ریاستی ادارے منتخب نمائندوں کی سیاسی سرگرمیوں اور پارلیمانی کردار کو روک سکتے ہیں؟ زیر حراست ارکان اسمبلی کی قانونی حیثیت اور مقامِ حراست سے متعلق حکومت سے واضح تفصیلات فراہم کرنے کا مطالبہ بھی کیا گیا ہے۔درخواست گزاروں کا کہنا ہے کہ آئین کے آرٹیکلز 232، 234 اور 245 کے تحت غیر معمولی اختیارات بھی بنیادی حقوق سے بالاتر نہیں، جبکہ گورنر راج کے نفاذ سے شہریوں کے بنیادی حقوق ختم نہیں ہوتے۔ حکومتی اقدامات عدالت کے عدالتی جائزے کے تابع ہیں۔درخواست میں مزید کہا گیا ہے کہ بانی نے محمود خان اچکزئی اور راجہ ناصر عباس کو حکومت سے مذاکرات کی ذمہ داری سونپی تھی، ریاستی مشینری کو سیاسی اختلاف دبانے اور منتخب نمائندوں کو غیر مؤثر بنانے کے لیے استعمال نہیں کیا جا سکتا۔
یہ بھی پڑھیں: سیالکوٹ ایئرپورٹ پر چھ سال سے لاوارث بوئنگ 767 طیارہ نیلام
محمود خان اچکزئی اور راجہ ناصر عباس نے عدالت سے استدعا کی ہے کہ تمام متاثرہ ارکان اسمبلی کو وفاقی آئینی عدالت میں پیش کرنے، ان کی حراست کا قانونی جواز جانچنے اور تمام زیر حراست منتخب نمائندوں کی فوری رہائی کا حکم دیا جائے۔
